Од кабинетот на Претседателот Стево Пендаровски во целост ја демантираат изјавата на поранешниот поглавар на Исламската верска заедница, Сулејман Реџепи искажана во емисијата „Клик Плус” на ТВ21.
„Претседателот Стево Пендаровски, ниту пред, ниту непосредно по изборите, имал било каква директна или индиректна комуникација со тогашниот поглавар на ИВЗ, од што јасно произлегува дека наводите искажани од страна на Реџепи се целосно измислени. Претседателот Пендаровски е избран на легитимен и легален начин, на фер и демократски избори, што е потврдено во сите извештаи на ОБСЕ/ОДИХР“, велат од кабинетот на Пендаровски.
Од таму додаваат дека ваквите изјави од Сулејман Реџепи се крајно несериозни и недолични, имајќи ја предвид неговата поранешна улога во Исламската верска заедница.
Реџепи претходно во гостување на ТВ21 изјави дека тој преку апел до граѓаните помогнал во изборот на Стево Пендаровски за претседател на државата.
