пишува: ЏАБИР ДЕРАЛА
Како се финансираат кампањите на ВМРО-ДПМНЕ? Партијата, како што кажа нејзиниот партиски функционер, Александар Николоски, должи 8 милиони евра. Од друга страна, имотот на партијата ги пробива сите плафони. Само во 2014 и 2015 година, ВМРО купи 63 канцеларии низ целата земја, со површина од 12.000 метри квадратни и вредност од 11 милиони евра.
Се разбира, посебна приказна е огромното седиште на 11.000 метри квадратни во центарот на Скопје. Како што е познато, она грдо чудовиште од зграда е подарок од градежната компанија Бетон, која никогаш не ја откри цената на оваа зграда, а процените се дека вреди околу 16 милиони евра.
ВМРО-ДПМНЕ води агресивна и скапа кампања со месеци наназад. Од каде пари за тоа? Прашани се за тоа повеќе пати, но одговор од Белата палата нема.
Впрочем, нема ниту еден одговор на повеќе од 40 прашања до Мицкоски и до портпаролите само во последните неколку месеци. На најразлични начини, формално преку мејл, но и со малку провокација, преку колумни, текстови и видео, се обидуваме да добиеме одговори, но има само молк.
Ако некој троши пари на граѓанките и граѓаните и се бори за позиции во власта, има должност да одговори на прашањата од јавноста. Ако некој одбива да одговори на вакви прашања, значи нешто крие, зарем не?
Да ги спомнеме и непокриените три и кусур милиони евра од изборите во 2011 година и околу 400.000 евра од претседателските избори во 2019 година. Да не говориме за процените од неколку милијарди евра што се исцицани од земјава за време на владеењето на Груевски. Да не зборуваме за милионските суми што „слетале“ на сметките на медиумите што се под нивна контрола.
На сето тоа, добија и буџетски 1.096.000 евра на своја сметка, пари на граѓанките и граѓаните само за оваа година. И наспроти сите повици, избегнаа да му го отстапат „милиончето“ на солидарниот фонд за борба против коронавирусот. Од тие пари ли се плаќа отровната кампања во пресрет на овие избори? Од тие пари ли ќе се плати печатењето на преку 80.000 маици што веќе се набавени?
Прашањето е кратко и јасно. Како се финансира најголемата опозициска партија, најбогатата во Европа, како што проценуваат познавачите.
Време е за одговори. Обврската не е само морално-политичка, туку и законска. Толку за денеска.
Сите права се задржани. ЛИНК: Услови за користење, авторски права и заштита на приватноста. Тесктот е личен став на Авторот.
