Кривичниот законик нема еден автор, а строгите казни во него понекогаш се пишуваат под притисок на јавноста, вели академик Владо Камбовски за „Слободен печат“, прашан за коментар во врска со изјавите на премиерот Димитар Ковачевски, кој два дена по ред изјавува дека строгите казни во Кривичниот законик се „од некое комунистичко време, направени од некој Дарт Вејдер на македонското судство и обвинителство“.
– Има осцилации од она што ќе го предложи работната група кога ја прави измената на Кривичниот законик до она што ќе биде конечно усвоено. Често има голем притосок во јавноста за да се усвојат построги казни за одредени дела, како што беше примерот пред неколку години кога се зголемија казните за педофилите откако претходино имаше случаи на силување на деца. Јавноста смета дека со построго казнување ќе се намали појавата на одредени кривични дела и врши притосок за пропишување на построги казни. Така беше и за време на транзицијата кога имаше притисок за поригорозни казни за оние што незаконски го присвоиле општествениот капитал. Исто така, во последната измена кога требаше да се усогласи Кривичниот законик со Истамбулската конвенција невладините организации и граѓанските здруженија кои беа во работната група бараа и издејствуваа построги казни против семејното и родово-базираното насилство – вели академик Камбовски за „Слободен печат“ во врска со висината на затворските казни, за чија висина деновиве во јавноста професори кривичари, како и премиерот Ковачевски коментираат дека се многу строги.
Камбовски вели дека Кривичен законик е обемна, сложена и чувствителна материја и никогаш нема еден автор.
– Се работи за обемни законици, за авторски дела на повеќе автори. Работната група која го подготвува новиот кривичен закон работи веќе три и пол години и во неа има повеќе експерти и сите заедно го подготвуваме – вели Камбовски, кој е дел од авторите на Кривичниот законик и на поранешната држава СФРЈ и на првиот КЗ во Македонија од 1996 година, како и на неговите подоцнежни измени и дополнувања.
Премиерот Ковачевски оправдувајќи ги најновите измени на КЗ кои денеска стапија на сила и со кои се намалија казните за лицата што ја злоупотребиле службената положба и овластувањата и се укина ставот за злоупотреба при јавни набавки, со што ќе застарат голем број на судски и истражни предмети против ексфункционерите од претходната власт вчера рече дека со измените казните се на ниво како во Словенија и во Германија.
– Тоа што претходно го имавме е закон во кој казните беа од некое комунистичко време, бидејќи беа направени од јас го нарекувам некој Дарт Вејдер на македонското судство и обвинителство и тоа не значи дека не треба да се променат – изјави вчера Ковачевски.
Денеска, пак, запрашан на кого мисли кога го споменува филмскиот негативец од „Војна на ѕвездите“, односно кој е Дарт Вејдер на македонското правосудство, Ковачевски одговори дека тоа ќе го остави на имагинацијата и на истражувачкиот потенцијал на новинарите.
– Да се навратат петнаесетина години во нашиот правосуден систем, да видат како се менувани одредени закони, да видат како се монтирани одредени процеси и тогаш ќе можат да видат кој е Дарт Вејдер на македонското правосудство. Потекнува од комунистичкото време – рече премиерот Ковачевски.
Извор: Слободен печат
