Деновиве можевме да слушнеме и прочитаме многу мислења на таканаречени експерти, аналитичари и професори во врска со договорот од Преспа и Амандманите на Уставот. Сите тие го толкуваат и бранат или напаѓаат договорот и Амандманите онака како тоа одговара на нивната политичка партија. За жал, во повеќето од тие анализи се користат многу невистини и силни навреди кон лицата кои ќе излезат со спротивно мислење од нивното, а сѐ со цел да се задоволи елитата на својата политичка партија. Сето тоа води кон дополнителни поделби на веќе поделеното население на: ваши и наши, патриоти и предавници, херои и кукавици и не знам уште колку поделби.
Не би сакал да спомнувам имиња но тоа се истите лица кои скоро три децении ја лажат јавноста. Лагата стана нивно секојдневие. Штета што нема светско првенство во лажење, веројатно ќе бевме шампиони.
Сите вие што бесрамно нѐ лажете, би сакал да ве потсетам на легендата која вели:
Еден ден, пред многу години, на брегот на едно езеро, се сретнале елегантната Вистина и валканата Лага. Лагата рекла „Времето е прекрасно, ајде да пливаме“. Така, се соблекле и влегле во водата. Вистината отпливала, а итрата Лага брзо се вратила, ја облекла елегантната облека од Вистината и си заминала. Кога Вистината допливала назад до брегот забележала дека ја нема нејзината облека, ниту пак Лагата. Пробала да ја облече облеката од Лагата, но не можела. Така, Вистината оттогаш оди гола. А некои повеќе ја сакаат Лагата во елегантната облека на Вистината, отколку голата Вистина.
Затоа би ве замолил да ги оставите партиските одела и кажувајте ја вистината. Со лаги никаде не се стига. Ако продолжите и понатаму да лажете, верувајте, ќе нема кој да ве слуша, ниту пак со вашите лаги ќе помогнете на политичките лидери да донесат правилни одлуки.
Ваше не е да лажете за содржините на договорот и Амандманите. Кој сака, може да ги прочита и без вашето толкување. Ваше е со факти да помогнете истиот да се имплементира или, ако сте против, со факти да докажете и да нѐ убедите зошто истиот да не се имплементира.
Во оваа прилика би сакал само да ве потсетам дека овој договор е втор договор потпишан под шатор, по оној од Аџитепе кај Куманово од 1999 година, со кој се реши иднината на регионот. Верувам дека знаете колку тешко оди имплементацијата на тој договор во изминатите скоро две децении.
Следно, договорот од Преспа е втор договор, по оној за Кипар, постигнат со посредство на преговарачот Метју Нимиц. Со какви безбедносни предизвици се соочи и колку е кревок тој договор и после пет децении од потпишувањето, проценете сами.
Зарем не можеме да извлечеме поуки од тие договори и да не го минуваме потешкиот пат?
Првите предизвици за договорот од Преспа беа референдумот и едвај обезбеденото двотретинско мнозинство за промени на Уставот. Резултатите беа такви како последица на лагите кои со денови ги повторувавте.
Следниот предизвик е гласањето за амандманите и, наместо во текот на јавната расправа, да се дискутира со аргументи и да се дават конструктивни и издржливи предлози, пак се кажуваат невистини.
Почитувани професори, во вашите дискусии никој или барем јас не слушнав некој од вас реално да направи анализа што ќе се промени во Уставот со предложените амандмани, а некои од предлозите не се ни целосно анализирани.
Така во нацрт амандманот 33 се предлага зборот Македонија во уставот да се замени со зборовите Северна Македонија на сите места во Уставот освен во членот 36. Во Уставот зборот Македонија покрај во членот 36 се користи уште во два члена.
Во членот 49 зборот Македонија се спомнува во смисла на правата на иселениците од Македонија. Овој член секако се преформулира со предлог амандманот 36 и нема потреба нешто двапати да се менува.
Според мене, најважниот момент е промената во членот 79, каде во ставот 2 стои: „Претседателот на Републиката е врховен командант на вооружените сили на Македонија“. Ако помине предлог амандманот ќе се добие дека претседателот е врховен командант на вооружените сили на Северна Македонија. Употребата на зборот северна пред зборот Македонија без зборот Република упатува на географски одредување на некој дел во случајов Северна Македонија. Таквата формулација нѐ наведува дека вооружените сили се единствено на северниот дел од Македонија.
Исто така, зборот Македонија е употребен во Преамбулата на Уставот и во два амандмана. Преамбулата и амандманот 9 се опфатени со новите амандмани. Додека, пак, во амандманот 7 зборот Македонија е спомнат кога се спомнува Исламската верска заедница во Македонија. По измените пак би се врзало на географски дел „Исламска верска заедница во Северна Македонија.“ што, пак, не е соодветна формулација.
За да се надминат проблемите потребна е поинаква формулација која вие професорите треба да ја кажете. Јас само би ве прашал дали место додавање на зборот Северна посоодветно би било да се додадат двата збора Република Северна. Така Претседателот на Републиката би бил врховен командант на вооружените сили на Република Северна Македонија, соодветно Исламската верска заедница би била во Република Северна Македонија.
Следниот предизвик за договорот ќе биде ратификацијата кај нашиот јужен сосед.
Потоа, ако дојде до ратификација, на истиот голем предизвик ќе биде цената на истиот што треба ние граѓаните да ја платиме. Никој не спомнува дека во Буџетот не се планирани средства за замена на документите, а колку ќе го чини замената на личната карта, пасошот и возачката дозвола може лесно да се пресмета. Затоа, требаше да предложите во Законот за уставните измени да се предвиди дека замената на сите документи ќе се изврши на сметка на државата, а не на поединецот.
Ова се вистинските предизвици за усвојување на амандманите од страна на собранието, а вие почитувани професори, не ги анализирате, туку и понатаму само лаги кажувате. Така, со вашите лаги, државата ни одеше надолу и стаса на работ на амбисот.
Затоа фрлете ги елегантните партиски одела полни со лаги. Ајде, со голата вистина да го видиме зеленото светло на семафорот и да го сопреме возот кој оди надолу, пред да падне во амбисот од кој нема враќање. Штом ќе го сопреме, сите заеднички да го потурнеме да појде побргу кон НАТО и ЕУ.
Вообичаено, колку време возот одел надолу, исто толку време и нешто повеќе му треба да се врати нагоре, но ако бидеме единствени и ако ја искористиме подадената рака од нашите пријатели од ЕУ и САД, верувам дека ќе успееме многу побрзо.
Авторот е полковник во пензија и експерт за национална безбедносна стратегија.
Преземање на содржините e ЗАБРАНЕТО ВО ЦЕЛОСТ, освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Врз основа на договор за соработка, оваа содржина е достапна за Плусинфо и Слободен печат без ограничувања.
