Според последниот Глобален индекс на иновации, Македонија се наоѓа на 84-то место од 126 држави, а во споредба со минатогодишното рангирање, има пад од 23 места.
Меѓу европските држави, Македонија се најде на претпоследното место, каде единствено е подобра од Белорусија.
Најиновативна држава е Словенија (30 место), по што следуваат Бугарија (37), Хрватска (41), Грција (42), Црна Гора (52), Србија (55), Босна и Херцеговина (77) и Албанија (80).
Секоја држава е рангирана според седум генерални области, а Македонија е најдобро позиционирана според категоријата „институции“, која ги мери политичкото, законското и бизнис окружувањето – рангирана на 49-то место, додека најлош резултат покажува во категоријата „креативен резултат“, каде е позиционирана на 107-то место.
Петте најиновативни држави според анализата оваа година се Швајцарија, Холандија, Шведска, Велика Британија и Сингапур, а на дното се Буркина Фасо, Того и Јемен.
Од друга страна пак, денеска, осумдесет домашни микро, мали и средни компании добија грантови во висина од 10,5 милиони евра преку мерките од третиот столб на владиниот план за економски раст, на повикот кој беше објавен од Фондот за иновации и технолошки развој се пријавиле 236 компании.
Чековите со добиените средства ги врачија премиерот Зоран Заев, вицепремиерот за економски прашања Кочо Анѓушев и директорот на Фондот за иновации и технолошки развој Јован Деспотовски.
Премиерот порача дека Владата подеднакво ги помага и домашните и странските компании и оти таа останува нивен партнер и сервис во реализација на нивните планови.
„Ова нека биде позитивен пример кој ќе ги мотивира и другите компании да создаваат квалитетни проекти и да влезат во инвестиции“, порача премиерот и ги повика да имаат доверба во институциите чие функционирање ќе се подобрува и ќе се приближува кон европските стандарди по добивањето на поканата за НАТО.
Директорот на Фондот рече дека со доделувањето на овие средства е важно дека зад секој 1,4 денар инвестиција од државата, приватната компанија инвестира денар. Истакна дека е важно што компаниите инвестираат.
Тој потенцира дека пристигнатите апликации се разгледани за многу краток временски период и дека за 33 дена се донесени одлуки.
Дали и колку овие грантови ќе помогнат во искачувањето на Македонија на скалилото на глобалниот индекс на иновации останува да покаже времето. Глобалниот индекс на иновации излегува веќе 11 години и се пресметува според 80 различни индикатори.
А. П.