Министерот за надворешни работи на Украина, Андриј Сибига ги поздрави во главниот град колегите од Албанија, Босна и Херцеговина, Молдавија, Северна Македонија, Романија, Словенија, Турција, Хрватска и Црна Гора.
Ова е многу важна министерска средба која го развива форматот Украина – Југоисточна Европа, ги спроведува договорите на нашите лидери и ја продлабочува соработката меѓу нашите земји заради безбедност, мир и правда во Европа“, изјави министерот за надворешни работи на Украина, Андриј Сибига.
Дипломатите ги разгледаа клучните прашања за зајакнување на регионалната соработка, поддршката за Украина во справувањето со руската агресија и заедничкиот напредок кон европската интеграција.
Како резултат на средбата, министрите усвоија заедничко коминике кое ја нагласува безрезервната поддршка за територијалниот интегритет на Украина и нејзиниот одбранбен потенцијал, потребата за воспоставување праведен и долгорочен мир, како и принципот „ништо за Украина без Украина“.
Документот исто така ја повикува меѓународната заедница да ја прекине поддршката за Русија, ги осудува обидите за анексија на украинските територии, ја потврдува меѓусебната помош на државите-кандидати во процесот на евроинтеграција и ја истакнува важноста на безбедносните гаранции за Украина, вклучувајќи го нејзиното идно членство во НАТО.
Страните се согласија за понатамошна соработка на патот кон интеграција на Украина и земјите од Западен Балкан во Европската унија . Земјите-членки на ЕУ ја потврдија подготвеноста да го споделат своето искуство од европската интеграција и да ги поддржат државите-кандидати, вклучувајќи ја и Украина”.
Сите ние, држави кои чекорат кон членство во Европската унија, не сме конкуренти, туку истомисленици кои преку проширувањето на ЕУ сакаат да придонесат за зајакнување на безбедноста и стабилноста на Европа, истакна Андриј Сибига.
Заменик министер во Министерството за надворешни работи и надворешна трговија на Република Северна Македонија, објави на Фејсбук дека денеска во Киев присуствува на средбата на министрите за надворешни работи на Југоисточна Европа, на која изрази поддршка за Украина и нејзината праведна борба против бруталната руска агресија.
– Ја нагласив сестраната воена, хуманитарна и политичка помош и поддршка што Македонија во континуитет и ја дава на Украина да истрае во одбраната на својот суверенитет и територијален интегритет и да постигне праведен мир.
На средбата со министерот за надворешни работи Андриј Сибиха подвлеков дека Македонија и Украина како кандидати за членство во ЕУ споделуваат заеднички вредности и се борат за исти цели поради што е неопходна засилена соработка и солидарност.
Со министрите и замениците министри за надворешни работи од ЈИЕ, положивме свежо цвеќе на Ѕидот на сеќавањето на жртвите од руската агресија, а остваривме средби и со претседателот на Собранието Руслан Стефанчук, со премиерот Денис Шмихал и со претседателот Володимир Зеленски.
Д.М.
