пишува: ЏАБИР ДЕРАЛА
Единствената политичка понуда на E Majta (во превод од албански: Левица), како што до неодамна се претставуваше во јавноста, се ограничува на ширење национализам и етничка омраза. Со своите ултранационалистички пораки во јавноста и во парламентот, шефот на E Majta, веќе одамна ги премина сите граници на дозволеното во јавната комуникација и во политичкото дејствување.
Иако се фали дека е професор по право, лажниот левичар не престанува да се брука со своето незнаење токму во областа на правото, како што беше случајот со неговиот конфликт со сообраќајниот полицаец, а веднаш потоа доби „воспитна“ и кога го „регулираше“ паркирањето на возилата.
Shefi i Të Majtës (во превод од албански: шефот на Левица) продолжува со својот отровен речник да ја контаминира јавната и политичка сцена, а ширењето националистичка хистерија му е некако „најприродно“ и „најпрофитабилно“, а во тоа, секако, не е сам. Тој може да биде само порадикален во настапот, со неприфатливо вулгарен и простачки речник, но основата на неговата политичка душа скита низ коридорите на белата палата на ВМРО-ДПМНЕ. Ништо повеќе.
Се згади од двојазичниот документ, токму тој што од тој двојазичен парламент, без приговор, зема плата. А платата ја обезбедуваат граѓанките и граѓаните на Северна Македонија кои зборуваат на македонски, албански, ромски, турски, српски, бошњачки, влашки… Ги нарекува северџгани, ама платата од нив си ја става в џеб. И сите други привилегии што му ги овозможува државата на тие северџгани, на кои ден по добивањето пратенички мандат им се обрати со зборовите: „Сите ќе ве стреламе“.
И пратеничките прашања во парламентот на Северна Македонија ги искористи за да ја притисне државата на северџганите да му плати реновирање на семејната куќа во Велес. Не за сите заштитени објекти во таа држава, ако веќе тоа било најгорливиот проблем, туку само за неговото семејство! Фер, нема што.
Кога лажеше Левица/E Majta? Кога ја негуваше двојазичноста и се фалеше со мултиетничкиот карактер на партијата или сега, кога нејзиниот шеф отворено промовира ултранационализам? Изразувањето презир кон документ кој, освен на македонски е и на албански јазик е само уште еден во бескрајната серија испади во јавноста и на политичката сцена. Со сиот вокабулар на Шешељ кој со бескрајна леснотија му излегува од под прстињата.
Ќе го блокира парламентот со илјадници амандмани? Зошто? За доброто на државата, за реформските и интеграциските процеси, за донесување законски решенија за подобрување на квалитетот на животот на луѓето, за законот за државјанство, за законот за служба во Армијата, изборите на раководства во регулаторните тела, за борба против последиците од пандемијата, за правосудните и изборните реформи… Или за евтин политички маркетинг преку лажни вести и ширење етничка омраза?
Најблаго кажано, тоа е чудно и крајно разочарувачко однесување на некој што се согласил да биде дел од највисокото законодавно тело во државата, а притоа да биде и дел од наставниот кадар во државна високообразовна установа. Најблаго кажано.
Поразителен е фактот, пратеник и претставник на нација која се бори да ги заштити македонскиот јазик и идентитет, со сета солидарност од сите заедници кои го сочинуваат македонското општество, да се „згрозува“ од јазикот на свои сограѓанки и сограѓани.
Но тоа е политичката агенда на Shefi i Të Majtës, да се шири омраза, да се застапуваат интересите на антизападните и антидемократските центри на моќта, да се блокираат сите прогресивни идеи и процеси. И да се полни сопствениот џеб со парите на северџганите.
Останува отворено прашањето дали овој политички ugursuz (во превод од турски: злобник) ќе прифати одговорност за етнички инцидент во кој некој може да се „згрози“ од јазикот на своите сограѓани и посегне по нивната безбедност и живот. Останува неизвесно дали јавноста и интелектуалците и понатаму ќе молчат пред оние што ги злоупотребуваат своите функции за ширење на етничка, верска и расна омраза (исто така и кривично дело). И за сето тоа, без нималку грижа на совеста, да го користат буџетот на Северна Македонија.
Текстот е личен став на Авторот.
Creative Commons 4.0
