од корнер: ЗОРАН ИВАНОВ
Засега сѐ упатува на тоа дека дванаесетти април ќе биде мегданот изборен. Овој пат со многу неизвесен епилог. Двете најголеми партии на располагање имаат побаеги и приближно ист арсенал за меѓусебни обвинувања. Посебно на темата криминал.
Оваа централна тема со воинствена реторика, како најава на кампањата, веќе ја наметнаа инструираните времени технички министри во времената пржинска влада. Значи, кампањски предизборни содржини веќе не толку досадни какви што се предавство, историско, идентитет, пасоши и слични небулози. Туку криминали.
Се чини дека во ВМРО-ДПМНЕ конечно разбраа дека со таквите подментнувања како за идентитетот, за јазикот, за референдумот, за променето име и за други глупости што не држат и што луѓето веќе ги прочитаа, нема да поминуваат во кампањата. Затоа пак, од уста нема да вадат криминали на власта.
Веројатно ПР стратезите на партијата и за овие избори ќе сметаат дека луѓето имаат кратко паметење. Па и покрај евидентните аудио презентации за криминалите на груевистичкото ДПМНЕ, како кец на десетка им дојдоа рекетите и другите глупости од ова време, нели време на СДСМ.
Притоа, секако се неспоредливи деценијата и нешто на едните со трите години на другите. Но факт е дека кампањата умее од мравка да направи слон, па СДСМ не ќе може да биде комотна посебно ако влезе во митингашки реторики да се брани и да брани што е неодбранливо. Тоа што му стои на располагање е да потсетува на содржините од бомбите и на фактот што ДПМНЕ не се помрдна од сенката на својот претходен лидер па партијата и на овие избори ќе трча со својата режимска наметка.
Се на се, и оваа изборна кампања ќе биде дизајнирана со висок степен на примитивизам. ДПМНЕ ќе форсира криминали, СДСМ интеграции. ДПМНЕ како маче ќе преде на тема договорите со соседите, СДСМ ќе премолчува за рекетите. Но граѓаните и од едните и од другите бараат одговори. За тоа што од нивното е вистина, а што не е. Што е подло меѓупартиско подметнување, а што се факти.
Сега, пред самиот старт на вербалниот изборен мегдан, прашањето е дали лидерите на двете моќни и за Македонија и за нејзините граѓани судбински политички партии, ќе ги имаат вистинските одговори. И што, ако воопшто умеат, можат предизборно бргу да сторат во насока на кадровски ослободувања од носителите на главната изборна тема.
Во предизбориево, Христијан Мицкоски јавно, транспарентно и силно да ги расчисти скаменетите груевистичка структури и со тоа да ја преобрази и целата ментална состојба на партијата.
Во предизбориево Зоран Заев, кој вети, а не запавта со метлата, посилно и посеопфатно да замавне барем со рачката.