Најчесто коментирана информација за новата министерка за финансии, Нина Ангеловска, е дека таа е на листата на 100 најуспешни жени основачи на старт-апи во Европа. Во 2016 година еминентниот германски магазин The Hundert ја вбројува Ангеловска во листата на 100 најуспешни жени основачи на старт-апи во Европа (100 Female Founders Europe), а во 2018 година магазинот Forbes ја наградува со престижното признание “30 под 30” (30 Under 30) за Европа во категоријата Малопродажба и Е-трговија.
Но, тоа не е крај на меѓународните признанија за Нина. Кон крајот на месец септември во Нујорк, таа ќе биде закитена со титулата жена амбасадорка за дигитилна трговија (eTrade for Women Advocate).
Според објавената биографија на новата министерка за финансии, Нина Ангеловска, се гледа дека има навистина импресивно образование.
Средното образование го стекнува во гимназијата Раде Јовчевски – Корчагин. Во 2010 година дипломира на Универзитетот Св. Кирил и Методиј – Економски факултет на департманот Е-Бизнис како најдобар студент на генерацијата и со постигнат успех од 9,94. Воедно ја добива Манинговата награда за најдобар студент на полето на економски науки.
За време на студирањето Нина e ангажирана како демонстратор на Економскиот Факултет по предметите: Математика за бизнис, Статистика за бизнис и Веб Дизајн, а воедно зема учество на повеќе национални и меѓународни натпревари. Од меѓународните натпревари, најзначаен е Balkan Case Challenge во Виена, поддржан од WUS Austria, каде Нина освојува 3-то место, додека од националните, најуспешна е на натпреварот за најиновативен бизнис план, организиран од Националниот центар за развој на иновации и претприемништво, каде освојува прво место, а со тоа и почетен капитал за реализација на нејзината бизнис идеја.
Во исто време, Нина продолжува со образованието на Економскиот факултет Скопје при Универзитетот „Св. Кирил и Методиј“ и во 2012 година се стекнува со звање Магистер на економски науки во областа на е-бизнис менаџмент. Во 2013 година таа ги започнува докторските студии и во 2016 година се стекнува со научен назив Доктор на науки по организациски науки и управување при Универзитетот „Св. Кирил и Методиј“.
Групер е чист македонски производ, бренд граден со многу напорна работа, кој опслужува над 200.000 корисници и соработува со над 3500 домашни и интернационални компании.