Според информацијата од Државната изборна комисија, од денеска до 25 август, ќе бидат комплетирани избирачките одбори кои ќе ги спроведуваат Локалните избори 2017, по случаен избор преку софтверот и базата на административци на ДИК. Во присуство на членовите на изборните комисии од 80-те општини и од Градот Скопје, изборот ќе се врши во Домот на АРМ.
Најдоцна до 26 август, и политичките партии во опозиција и политичките партии на власт, кои на последните избори за пратеници освоиле најмногу гласови, треба до Општинските изборни комисии (ОИК) да достават предлози за членови на избирачките одбори и нивните заменици. Најдоцна до 27 август, ОИК треба да ги формираат избирачките одбори што ќе ги спроведуваат локалните избори закажани за 15 октомври.
Врз основа на член 49 став 1 од Изборниот законик, Државната изборна комисија на седницата одржана на 20 август 2017 година, усвои Јавен повик за проверка на податоците во Избирачкиот список.
Од вчера (21 август) до 9 септември на полноќ, течат роковите за увид во Избирачкиот список и за собирање на потписи (до 4 септември на полноќ) пред овластени претставници на ДИК за предлагање на листа на кандидат за градоначалник и за членови на Советот на општината од група избирачи.
Јавниот увид во Избирачкиот список се спроведува во подрачните одделенија и канцеларии на Државната изборна комисија и во дополнително отворените канцеларии во седиштата на единиците на локалната самоуправа, во време од 08:30 до 19:00 часот, вклучувајќи ги и деновите од викенд и празници.
Избирачкиот список се става на јавен увид со состојба на податоци на: граѓани со наполнети 18 години живот со важечка лична карта или пасош на денот на изборите (15 октомври 2017 година) и почитани лица – 30 дена пред денот на распишувањето на изборите (6 јули 2017 година), како и други податоци од Избирачкиот список на денот на распишувањето на изборите (6 август 2017 година)
