Откако на 15 август во населбата Кисела Вода двајца вработени во ЈП „Комунална хигиена“-Скопје вербално ја нападнаа новинарката Илинка Иљоска вработена во новинската агенција Мета и се обидоа да ја спречат при вршење на работна задача, денеска се огласија од ова јавно претпријатие, пишува Мета.
„Најостро го осудуваме вербалниот напад врз новинарката на новинската агенција “Мета” која си ги извршувала своите обврски. Против вработените, ЈП „Комунална хигиена“ Скопје ќе поведе соодветна дисциплинска постапка“, наведено е во одговорот кој Мета.мк го доби од ова јавно претпријатие.
Од ЈП „Комунална хигиена“ додаваат дека ги охрабруваат сите медиуми и јавноста будно да ја следат работата на „ЈП Комунална хигиена“-Скопје и дека за сите прашања остануваат отворени и транспарентни.
Пред четири дена, кога се случи вербалниот напад, веднаш реагираше Здружението на новинарите на Македонија (ЗНМ). Покрај тоа што од ЗНМ обезбедија правна помош за новинарката Иљоска, тие од „Комунална хигиена“-Скопје побараа да покренат дисциплинска постапка против одговорните лица за вербалниот напад врз новинарката. Исто така, од оваа институција упатија барање и да направи план за активности за едукација на вработените на теми од јавен интерес и однос кон граѓаните, бидејќи не е прв пат од „Комунална хигиена“-Скопје да реагираат на ваков или сличен начин кон граѓаните.
Вербалниот напад е пријавен во полиција и се очекува Одделението за насилен криминал да го испрати предметот до надлежното обвинителство.
