Климент Арнаудов, граѓански новинар и активист за правата на животните од Охрид, испрати до ЦИВИЛ – центар заслобода информација за тоа како Комуналното претпријатие од Охрид го решава проблемот со бездомните кучиња во градот. Во текстот објавен на clp.mk, Арнаудов пишува: „Ситуација: Депонија Буково, ден 07 јуни 2017, час 17.00. Она од што стравувавме, дека кучиња се заловени од комуналната служба и дислоцирани, се покажа вистина. Душиве ги снема преку ноќ, откако се вртеа на плоштад… (фотографии од тој период https://m.facebook.com/story.php…). Дошле петокот во ниедно време, со бело комбе, и истурале чиниш отпад, а не живот. Која грозоморност, со наши пари плаќаме грозоморности вакви да прават, да наредуваат грозоморија, ужас!“
„Оваа црната е бремена, пред пораѓање, мајкичка треба да е, а ко партал непотребен ја исфрлиле. Оваа шаренката, со пари од проект од Oпштината, ‘Анималиа’, ја стерилизира и ја врати на место на заловување (раната од операцијата сè уште се познава). Она црното, со бело, требаше да го згрижиме и да го токмиме в Холандија да го вдомат, откако странци покажаа интерес, со денови се изнабаравме поџабе низ град, за лица од институцијата ЈП ‘Комуналец’, еве вака, го исфрлат и него. Преплашени ги затекнавме, нејадени со денови со оглед што тука има кучиња од порано што терен си чуваат и над храната што во отпад ќе ја најдат доминираат. Ова е рамно на обид за убиство! На последните слики, пред самиот влез на депонијата, прегазено кутре, ете како ненавикнати на таква средина и исплашени, под кола завршуваат лесно, но и причина за нечиј изгубен човечки живот во сообраќајќа може да бидат“, пишува граѓанскиот новинар.
„Ова е крајно незаконито и нечовечно, и ако некој од одговорните не сноси санкции за ова грозоморие, само ќе се испрати лоша порака за градот и граѓаните… Ветеринарните инспектори си молчат, еве ние вака, граѓаниве, треба и тоа нивното да го сработуваме, да истражуваме, да контролираме, оти грам човечност не остана во оние ш’о на клучни позиции запоседнаа, и пример што требаше да ни бидат. Еве, каков пример тоа ни се…
Апелирам, лицата од ЈП ‘Комуналец’ да не ми вртат на телефон и да ми објаснуваат како што минати пати тоа чинеле, по секоја основана критика кон нив упатена. Тоа што в лице ме лажеле и мене и другите активисти, тоа говори за ничкосаноста на нивната душа, од која душа таква трпат и кученцава сироти. Од денес, освен по институционален пат, поинаку муабет не чинам со нив. И со доказен материјал, еве, се виде нивното право лице. Се гледаме на суд!“, пишува Климент Арнаудов, граѓански новинар од Охрид.