Општествено-политичката реалност и перспективите во 2019 година ќе бидат ставени под лупата на голем број учесници на конференцијата #Перспективи2019 што ќе се одржи утре, на 13 февруари, во Кино Култура, со почеток во 11 часот.
Воведни излагања ќе имаат германскиот амбасадор Томас Герберих и Министерката за труд и социјална политика, Мила Царовска. Списокот на говорнички и говорници содржи значајни имиња од областа на политиката, медиумите и граѓанското општество, што секојдневно се чувари на објективните сознанија и факти. На Конференцијата ќе се говори на темите „Меѓу надежите и реалноста“ (општествено-политичките процеси и економските прашања) и „Историски завршници и отворање на новите перспективи“ (Евроатлантски интеграциски процеси).
И на овој настан на ЦИВИЛ, јавноста ќе има можност да ги види и слушне оние што со години беа и останаа остри критичари на лошите политики и практики, без оглед на тоа која партија е на власт.
Меѓу говорничките и говорниците ќе бидат проф. Мирјана Најчевска, Џевдет Хајредини (поранешен министер за финансии), Бранко Героски (Плусинфо, Слободен печат), Александар Кржаловски (МЦМС), Мерсиха Смаиловиќ (Легис), Кочо Андоновски (Центар за поддршка на ЛГБТИ+) и Фатон Алити. Во име на ЦИВИЛ, ќе говорат Биљана Јордановска, Диана Тахири, Дехран Муратов и Џабир Дерала. Агендата и листата на говорнички и говорници, како и секогаш кога се работи за настаните на ЦИВИЛ, останува отворена.
„Најдобро инвестираното време е она во кое се учи и се разменуваат ставови и сознанија. Затоа, терминот од 11 до 13:30 часот ќе биде одлична можност да се направи таа инвестиција. Сигурни сме дека оваа конференција ќе биде запаметена по сериозноста и критичкиот тон, како и секогаш“ – велат од тимот на организаторите на конференцијата.
Од почетокот на декември минатата година наваму, тимот на ЦИВИЛ МЕДИА направи низа прилози со политичари, експерти и активисти кои за јавноста ги претставија своите согледувања на изминатата 2018 година, како и своите прогнози и препораки за 2019 година. Освен тие прилози, при подготовките за оваа конференција земени се предвид и анализите, интервјуата и колумните на голем број носители на одлуки, како и авторки и автори што се дел од медиумската продукција, мониторингот и анализите на организацијата во изминатиот период.
Настанот е дел од проектот „Граѓанките и граѓаните за слободно општество“, финансиран од Министерството за надворешни работи на Сојузна Република Германија.
ЦИВИЛ Тим за комуникации
