Европските лидери му ја честитаат големата изборна победа на албанскиот премиер Еди Рама, кој од изборите што се одржаа на 11 мај, излезе со 83 мандати.
Косовската претседателка ги покани партиските лидери на консултации, по 15 неуспешен обид за конституирање на собранието, а претходно се сретна со шефот на канцеларијата на ЕУ, Аиво Орав, на разговор за политичката криза во Косово.
Во продолжение се поместени содржините од денешниот редакциски избор на ЦивилМедиа, од албанските медиуми во регионот.
АЛБАНИЈА
Топ Чанел- Претседателот на Европскиот совет му честита на Рама за победата: Импресивно! Едвај чекам утре лично да ви честитам
Претседателот на Европскиот совет, Антонио Кошта, му честиташе на Еди Рама за силниот резултат на парламентарните избори на 11 мај, пренесе Топ чанел.
Преку објава на социјалната мрежа „X“ (порано Твитер), Кошта му упати срдечни честитки на Рама, опишувајќи го резултатот како импресивен.
„Најтопли честитки, драг Еди Рама, за овие импресивни изборни резултати. Едвај чекам да ви честитам лично утре во Тирана“, напиша Антонио Кошта.
Неговата посета на главниот град на Албанија се очекува да се одржи во рамките на Самитот на Европската политичка заедница, што ќе се одржи овој петок во Тирана, каде што ќе учествуваат бројни европски лидери.
На Рама му честиташе и Урсула фон дер Лејен, Виктор Орбан, и други европски политички лидери.
Опинион: Социјалистите водат со 83 мандати, Демократите имаат 50
Процесот на броење на гласовите за гласање на територијата на Албанија е завршен низ целата земја, додека броењето на гласовите од дијаспората, како и гласовите за кандидатите, продолжува.
Според прелиминарните податоци на ЦИК, 1.458.251 лице, или 42,21%, гласале на домашните избори на 11 мај.
Според досегашните резултати, СП води со 83 мандати, додека Демократската партија има 50. Останатите мандати се поделени меѓу четири други партии, а третата најсилна сила досега е Социјалдемократската партија со 3 мандати, пренесе Опинион.
Партијата на можности обезбедува два мандата. Исто така, Движењето Заедно и иницијативата „Албанија е создадена“ досега обезбедија мандат.
КОСОВО
ТВ 21: Османи на средба со шефот на канцеларијата на ЕУ, Аиво Орав, во пресрет на средбата со политичките лидери во Косово
Претседателката на Косово, Вјоса Османи, денес го прими шефот на канцеларијата на Европската Унија во Косово, Аиво Орав, со кого разговараше за актуелната политичка состојба во земјата, пренесе ТВ 21.
Османи го информираше амбасадорот Орав за консултативната средба со лидерите на политичките партии, закажана за четврток.
За време на состанокот, беа разгледани и важните посети на високи лидери на Европската Унија на Косово, вклучувајќи ја и денешната посета на претседателот на Советот на ЕУ, Антонио Коста, како силен сигнал за поддршката на ЕУ за европската интеграција на Косово.
Бота сот: Кошта на посета во Косово
Претседателот на Европскиот совет, Антонио Кошта, ќе го посети Косово, пренесува Бота сот.
Во дневниот ред објавен од ЕК е наведено дека високиот европски функционер ќе се сретне со претседателката Вјоса Османи, со која ќе одржи и прес-конференција со почеток во 16:40 часот.
Два часа подоцна, почнувајќи од 18:40 часот, се очекува тој да се сретне со вршителот на должноста премиер, Албин Курти.
КОЛУМНА
Коха: Табела за претседателот Кошта: Кој е партнер на ЕУ?
„Фактичкиот наод, во извршното резиме што ќе му биде доставено на претседателот Коста од оваа табела, би бил следниот:
„Косово се смета за посветен партнер за интеграција во ЕУ, со целосно усогласување на надворешната политика и релативно плуралистичка средина за медиумите и граѓанското општество. Сепак, предизвиците продолжуваат во спроведувањето на правата на заедниците и зајакнувањето на независноста на судството.“
Србија се соочува со демократска регресија, сериозни проблеми со слободата на медиумите и дестабилизирачко влијание во регионот. „Слабата усогласеност со надворешната политика на ЕУ и рестриктивните законски иницијативи го доведуваат во прашање нејзиниот кредибилитет како кандидат за членство.“
Проблемот, секако, ќе биде во преведувањето на фактичкиот јазик во јазик на политиката на ЕУ. Тука лежи предизвикот за новиот состав на раководството во Брисел. Ако Косово, во сопствените анализи на Комисијата, е посветена земја-партнер на ЕУ, додека Србија е земја која сè повеќе се оддалечува од европските патеки, овој контраст повеќе не е само статистика. Овој контраст го поставува фундаменталното прашање за политиките на ЕУ: како е можно земја што се однесува како сојузник, како Косово, да остане надвор од основните механизми на интеграција – како што се ИПА фондовите (во целосна и еднаква форма), процесот на проширување или програмите за постепено вклучување – додека земја што ги оспорува вредностите на ЕУ, како Србија, продолжува да ужива привилегии како кандидат?
Недостатокот на консензус за признавање на Косово меѓу земјите-членки на ЕУ е несомнено главниот фактор што влијае на овој асиметричен третман. Но, ова не треба да биде изговор за политиката на „двојни стандарди“. За ЕУ, времето на двосмисленост мора да заврши. Не може да се тврди дека политиката на проширување е инструмент на демократска трансформација ако ги наградува оние кои ги предизвикуваат европските вредности повеќе отколку оние кои ги почитуваат. Косово и Србија веќе не се на истиот пат кон Брисел. Прашањето повеќе не е кој доцни, туку кој си заминува.“, пишува Авторот Ветон Сурои во колумната „Табела за претседателот Кошта: Кој е партнер на ЕУ?“, објавена во косовскиот дневен весник Коха.
Подготви: Д. Тахири
