Премиерот Ковачевски се надоврза на дискусијата што по повод резултатите од истражувањето ја иницираа претседателот на Средношколскиот сојуз Лука Павичевиќ, Рита Бехадини, новинарка и претседателка на Центар за еднакви можности Бубамара и Дениз Селмани програмски менаџер на Ромалитико, и истакна дека Владата со политиките за инклузивност продолжува со отворање на можности за учество на младите во секторите кои имаат највисок импакт во БДП и економскиот раст на државата како што се ИТ индустријата, дигитализацијата и енергетиката, особено во делот на изградба и на ставање во функција на капацитети од обновливи извори на енергија.
Овие приоритети, со најголемо учество на младите, истакна премиерот Ковачевски, ги надоместуваат последиците од дисконтинуитетот на развојот на нашата држава, која од екстензивната економија која доминираше до независноста, направи сериозна транзиција кон економија заснована на модерните технологии во која доминантно место имаат младите.
Претседателот на Владата Димитар Ковачевски во делот на дебатата на конференцијата „Социо-политичкото учество на младите“, на која се презентираа резултатите од истражувањето „Социо-политичкото учество на младите“, нагласи дека Владата продолжува со политиките на охрабрување на младите за да учествуваат во процесите за развој на нашата држава бидејќи тие во изминатиот период учествуваа во унапредувањето на државата и тие да останат да ги предводат овие процеси.
Во таа насока, на иницијатива на Владата започна подготовката за изработка на нов Закон за средното образование кој треба да го замени постојниот, кој постои веќе 20 години и кој не ги има предвид брзиот развој на општествата, особено во делот на учеството на новите дигитални технологии што во најголем дел ги засегаат младите, нагласи Ковачевски
Премиерот Ковачевски порача дека целта на Владата е ја да зголемува довербата на младите и тие самите да учествуваат во креирање на извесна и сигурна иднина со реализација на таргетирани политики за зголемување на младинската вработеност и за општество во кое младите ќе препознаат заедница за подобар живот за сите.
„Убаво е кога имаме можност да го слушнеме гласот на новите генерации. За нас како Влада е многу важно отворено да зборуваме за барањата, сугестии и иницијативите на младите. Токму овој инпут, што како претставници на институциите го добиваме директно од вас младите, ни дава можност да бидеме се подобри и попрецизни во исполнувањето на вашите очекувања. Тоа е вашиот придонес за креирањето на политики кои се однесуваат на сегашните и на идните генерации“, рече премиерот Ковачевски во обраќањето на настанот „Социо-политичко учество на младите“
Премиерот посочи дека токму како резултат на системските решенија од 43,2% во 2015 година невработеноста на младите сега е намалена на 28,3%. Во континуиран дијалог со студентите и средношколците се донесени мерки со кои се јакне студентскиот и ученичкиот стандард. Во моментот над 36.000 студенти користат субвенциониран студентски оброк во износ од околу 3.000 денари месечно, а за речиси два пати ги зголемивме студентските и ученички стипендии и воведовме нови видови стипендии.
„Сето ова го кажувам единствено како поттик за сите нас заедно да работиме уште повеќе и посериозно на сето она што ќе ви овозможи да си ги остварите соништата тука, дома. На сите нам ни е јасно дека за да се случи тоа, треба да се работи и на приоритети како што се владеење на право, економска и социјална стабилност, еднакви можности за сите и здрава животна средина. Стојам на девизата дека само младите знаат што е најдобро за нив и затоа и понатаму остануваме ваши сојузници и партнери во креирањето општество во кое ќе има место за сите да си го остварат целосниот потенцијал“, рече премиерот Ковачевски.