Кривична пријава и суспензија за полицаецот кој тепаше Ром во Битола

Поведена е кривична пријава против еден полициски службеник од Битола, кој вчера брутално нападна Ром во Битола. Тој заедно со уште еден негов колега кој бил присутен за време на инцидентот ќе бидат суспендирани, објави попладнево министерот за внатрешни работи Оливер Спасовски.

„МВР осудува каков било вид на насилство, особено кога тоа го направил полициски службеник. Ниту еден ваков чин не може да се поправи. МВР вложува многу во менувањето на ликот на полицијата и полициските службеници. Нашата цел е полиција која ќе биде во служба на граѓаните“, рече Спасовски.

Тој го осуди и нападот на полициските службеници од страна на двокрадци во велешко. Приведени се четири лица и има 10 осомничени лица. Спасовски рече дека се вршат претреси и се преземаат дополнителни активности со цел да се расчисти случајот. Очекува и брза постапка од Обвинителството.

Претходно и премиерот Зоран Заев ја осуди бруталноста од страна на полициските службеници врз граѓаните Роми во Битола.

„Таквото однесување е срамно за полицијата, ја заслужува осудата која пристигна од јавноста.

За поздравување е што Одделот за внатрешна контрола, криминалистички истраги и професионални стандарди при Министерството за внатрешни работи го утврди идентитетот на учесниците на овој исклучително немил настан, и очекувам дека многу бргу, по утврдените околности да следува целосна одговорност и соодветна казна на сите инволвирани во случајот“, пишува Заев на својот Фејсбук профил.

Тој додаде дека вложиле многу во менувањето на ликот и однесувањето на полициските службеници и нема да дозволат, дури и вакви изолирани случаи, да поминат без одговорност и соодветна казна.

На социјалните мрежи вчера се појави видео на кое неколкумина полицајци жестоко тепаат Роми од Битола.

Претседателот на ЦИВИЛ, Џабир Дерала изјави дека полицијата мора да биде пример за законито однесување.

„Згрозени сме од бруталноста на полициските службеници во снимката што беше објавена денеска. Во овој случај, правната држава треба да одреди најстрога санкција според законот. Униформата не смее да биде заштита на насилниците, туку заштита од насилството. Неказнивоста мора да престане“, нагласи Дерала.

А. П.