Градот Скопје реши да им стави крај на нелегалните продавачи. Вчера на улицата „Брадфордска“ во Козле, кај мостот „Влајко“ во Влае и на булеварот „Трета македонска бригада“ во Аеродром, беа запленети над 10 тони стока, која по направените записници од пазарната инспекција беше однесена во Агенцијата за управување со одземен имот. Градот Скопје изрече вкупно 8 казни на нелегалните продавачи по основ прекршување на Законот за јавна хигиена.
Лесно е да се отстранат дивите продавачи кои цел ден работат на нива за потоа да може да продадат некоја лубеница и да им однесат леб на децата, меѓутоа на градските власти некако тешко им оди со отстранување на дивопоставените споменици, објекти, или терасите на угостителските објекти.
Лесно се справуваат со сиромашниот народ, односно му го одземаат и тоа што го има за преживување, додека моќниците не се чепкаат. Досега не видовме некоја конкретна акција или проект на Градот Скопје со кои би им се овозможил подобар и подостоен живот на скопјани. Видовме дека се оградуваат и од плаќање на штети на граѓаните, по невремето во Скопје.
Единствена добивка имаат „боемите“ кои ако се напијат во кафеана ќе добиваат ваучери за такси превоз. Додека оние граѓани што пијат домашна ракија додека на сонце продаваат лубеници, марули, коприви…, „на црно“, на некое место низ Скопје, наместо ваучери, ќе добиваат казни.
Од Градот Скопје додаваат дека од идната сезона ќе се залагаат за соработка со општините со цел регулирање на начинот на сезонската продажба на ваквата стока.
Ама од следната сезона! Оваа сезона нелегалните продавачи ќе останат без стока и до следаната година ќе мора да си ги плаќаат казните, ако имаат со што да ги платат.
Борбата со нелегалните тезги се одвива и на Бит-пазар, меѓутоа колку успешно се спроведува таа мерка, доволно е да се прошета низ Бит-пазар, особено после пладне, и ќе се види дека тоа не функционира така како што замислиле градските власти.
Дали со одземање на стоката и со пишување казни ќе се спречи нелегалната продажба и ќе се подигне животниот стандард на граѓан(к)ите? Дали градот ќе биде многу почист по отстранувањето на нелегалните продавачи? И на крај, од што ќе живеат тие луѓе на кои им е одземена стоката?
Ќе се охрабри ли власта и конечно да се позанимава со вистинските криминали во државата или ќе продолжи да спроведува селективна правда само онаму каде што се најслабите и најранливите?
Дехран Муратов
