Дневен преглед на најважните настани во Република Македонија: Хајндл испорача три приоритети за Македонија || Левица ги поддржа барањата на Шарената револуција || Продолжува полицискиот притисок врз активистите || Протести на судската администрација || Шарената револуција го блокира сообраќајот во Скопје || и повеќе…
Хајндл испорача три приоритети за Македонија
Специјалниот пратеник на германскиот министер за надворешни работи за Македонија, амбасадорот Јоханес Хајндл, испорача три приоритети со кои треба да се искористи позитивниот момент по целосното повлекување на аболицијата на претседателот на РМ, Ѓорге Иванов. Хајндл порача дека партиите треба да се договорат за датум на изборите и да ги исполнат условите за слободен и фер изборен натпревар, СЈО да работи без опструкции и слободно, а реформските приоритети од извештајот на Прибе да се спроведат без одлагање.
Левица ги поддржа барањата на Шарената револуција
Левица во официјално соопштени за јавноста ја истакнува потребата од целосно исполнување на барањата на Шарената револуција. “Нашите барања се сите седум барања на „Протестирам“. Сите тие мора да се исполнат за Македонија конечно да добие шанса да се врати во правилниот колосек. Не смееме да им дозволиме на елитите, зад затворени врати, да ни ја кројат судбината и резултатот од сето тоа повторно да бидат половични решенија како минатата година”, се вели во соопштението.
Продолжува полицискиот притисок врз активистите
Еден од активистите на Шарената револуција во Прилеп е повикан во полициска станица на „информативен разговор“ по втор пат. „Повикан сум да дадам известување во врска со прекршок од чл. 191 од Законот за безбедност на сообраќајот на патиштата. Впрочем, ова е само продолжување на приказната од пред две недели. По ист член од истиот закон, се обидуваат да ми припишат прекршок којшто не сум го сторил, како учесник во Шарената револуција и за начинот на којшто го демонстрирам моето демократско право на протест од политиките на власта. Тоа им го предочив и тогаш“, изјави Стеваноски за ЦИВИЛ Медиа.
Протести на судската администрација
Министерот за правда доби црвен картон од судската администрација со протестот кој се одржа на 8 јуни. Судските административци тргнаа од пред зградата на синдикатите кон парламентот, за потоа да се упатат кон Министерството за правда. Обезбедувањето на министерството не му дозволи на Генералниот секретар на УПОЗ Пеце Груевски да влезе во министерството да ги испорача барањата. Судската администрација побара оставка од министерот.
Шарената револуција го блокира сообраќајот во Скопје
Со порака испишана на крстосницата кај Соборниот храм: “Раскрстивме со вас – 18.06.2016!”, напладне започна блокирањето на сообраќајот во Скопје. Поддржувачите на Шарената револуција ги блокираа крстосниците кај Соборниот храм, кај Судската палата и кај Црвениот крст. Блокадите и протестите ќе продолжат до исполнување на барањата на Шарената револуција.
Избор од продукцијата на ЦИВИЛ Медиа
Не помагаат веќе „чадните завеси“! – колумна на Синиша Станковиќ за обидот на власта да дигне „чадна завеса“ со спектакуларни апсења на Економскиот факултет за да ја покрие штетата од јавноста која ја претрпе со целосното повлекување на аболицијата на осомничените од истрагата на Специјалното јавно обвинителство.
Граѓанското новинарство на барикадите на вистината и слободата – осврт на Џабир Дерала посветен на граѓанското новинарство.
Најави
Бори се против апатијата – обука за граѓанско новинарство (10:30-18 часот, настан од затворен карактер, учество само со одобрена апликација) и церемонија за доделување награди за граѓанско новинарство (18-19 часот, отворен за јавноста).
ЦИВИЛ го објавува овој преглед на дневни настани со цел да придонесе кон објективното информирање за настаните и процесите, но и за настани за кои еден дел од медиумите во Република Македонија не информираат или информираат многу малку. Вашето мислење е важно за нас. Ве молиме, вашите коментари, сугестии, информации, фотографии и видео прилози испраќајте ги на нашата Фејсбук страница или на e-mail: [email protected]
