„Спорна е одлуката на македонскиот суд… Замислете, кривични пријави сега да се покренат против сите граѓани кои деновиве, на социјалните мрежи пишуваа во негативен тон за Вучиќ и Дачиќ, на пример…“, вели за ЦИВИЛ Медиа, адвокатот Александар Тортевски, по повод пресудата против македонскиот граѓанин
Судот во Скопје пресуди дека поради навреди на социјална мрежа упатени кон претседателот на Турција, Реџеп Таип Ердоган, лицето Е.А. кое има македонско и турско државјанство, ќе мора да плати парична казна од околу 400 евра.
Судскиот процес беше покренат по кривичната пријава од амбасадорката на Турција во Македонија, Тулин Еркал Кара, кон крајот на минатата година, јави турската агенција „Анадолија“. Во пресудата се наведува дека обвинетиот, во ноември 2016 година, преку својот профил на социјална мрежа „објавил иронични изјави и упатил навреди кон лидерот на една странска земја“.
Според членот 181 од Кривичниот законик, предвидена е парична казна за „тој што со намера за исмејување јавно ќе изложи на подбив странска држава, нејзино знаме, грб или химна или шеф на држава или дипломатски претставник“.
Еминентниот македонски адвокат Александар Тортевски, по повод ваквата судска одлука, за ЦИВИЛ Медиа, изјави: „Не сум ја видел пресудата, за што конкретно е осуден граѓанинот. Но, спорна легитимацијата на амбасадорката, зашто таа е претставник на Република Турција, а не е претставник на господинот Ердоган. За амбасадорката да поднесе кривична пријава, треба да има полномошно… Спорна е и одлуката на македонскиот суд. Замислете, кривични пријави сега да се покренат против сите граѓани кои деновиве на социјалните мрежи пишуваа во негативен тон за Вучиќ и Дачиќ, на пример, по повод повлекувањето на дипломатскиот персонал од српската амбасада!?“
Но, доколку, осудениот Е. А. не ја плати паричната казна од 24.600 денари за објавувањето на „иронични изјави и упатувањето навреди кон лидер на една странска земја“, ќе мора да „одлежи“ затворска казна.
Наспроти веста за судската пресуда во Скопје, германскиот министер за надворешни работи Зигмар Габриел, во интервју за германскиот весник „Билд“, изјави дека „Турција никогаш нема да стане членка на ЕУ се додека со неа управува Реџеп Таип Ердоган“.
Според Габриел, „земја (Турција – н.з.) која ја ограничува слободата на говорот, затвора невини луѓе и ја потиснува опозицијата, не може да стане дел од ЕУ… Јасно е дека во оваа состојба, Турција никогаш нема да стане членка на ЕУ. Не затоа што ние не сакаме, туку затоа што турската Влада и Ердоган брзо се оддалечуваат од сè кон што се стреми Европа“
