Педесет илјади тестови за КОВИД-19, десетина илјади литри раствори за дезинфекција, но и големо количество медицинска и заштитна опрема е наведена во македонското барање до НАТО Евро-атлантскиот Центар за координација на одговор на несреќи, испратено на 30 март. Центарот за координација на одговор на несреќи е тело на Алијансата кое, во вакви ситуации, ги прима барањата на сојузниците на кои им е потребна помош, и ги ускладува со вишокот или расположивите капацитети на други сојузници, кои можат да помогнат. Тоа е и наведено во последната точка на документот во кој е опишано барањето за помош на Македонија:
„Со цел да и се овозможи координиран одговор на Република Северна Македонија во нејзините барања, државите кои се во можност да одговорат на овие барања, во целост или делумно, се поканети да одговорат преку Оперативната контактна точка…“ наведува Центарот во документот со назнака „приоритетно барање“, со кој им се обраќа на сите сојузнии .
Во моментот кога е побарана помошта бројот на евидентирани заболени бил 285, од кои 164 во Скопје, а 7.307 граѓани биле во самоизолација. Најзасегнат бил Дебар, со 162 заболени на 100.000 жители, Скопје имало 23 на 100.000, а Штип 15 заболени на 100.000 жители. Во барањето се нагласува дека на 18 март била прогласена вонредна состојба во траење од 30 дена.
Македонија од Координативниот центар побарала:
- 200.000 заштитни одела тип Ц (скафандери),
- 100.000 заштитни наочари за еднократна употреба
- 800.000 заштитни медицински нитрилни ракавици во различни големини
- 500 безконтактни инфрацрвени термометри
- 50.000 тестови за КОВИД-19
- 20 механички респиратори
- 50 мобилни уреди и системи за дезинфекција
- 5.000 антисептички раствори за дезинфекција на раце, во пакувања од 250 до 750 милилитри
- 6.000 раствори за чистење и дезинфекција на работни попвршини, во пакувања од 500 до 1.500 милилитри
- 20.000 течни концентрати за чистење и дезинфекција на работни површини, во пакувања од најмалку 900 милилитри
- 10 мобилни рефлектори (болнички)
- 20.000 заштитни маски со ново ФФП3/Н95
- 500.000 хируршки маски
- 30 монитори за интензивна нега
- 100 пулсни оксиметри, (уреди за мерење на нивото на кислород во крвта)
- 25 дефибрилатори, („електро-шок“ уреди)
- 500 комплети за интубација
- 2 мобилни дигитални рентген апарати
По состанокот на шефовите на дипломатиите на земјите-членки на НАТО, на кој македонскиот министер за надворешни работи беше прв претставник на земјата како полноправна сојузничка, Никола Димитров изјави дека во Алијансата биле пријавени „тие потреби во смисла на медицинска опрема, материјал… итн.“, но, истовремено, се разгледува и кои македонски капацитети би можеле да им бидат ставени на располагање на сојузниците за нивните потреби во борба со пандемијата.
Игор К. Илиевски
