Костадин Костадинов, портпаролот на СДСМ, денеска реагираше на изјавата на Христијан Мицкоски дека се обврзува на инвестиции во патната инфратсруктура во износ од две милијарди евра, почнати во време на последниот мандат на ВМРО-ДПМНЕ, но и неколку нови.
Костадинов изјави дека за разлика од ВМРО-ДПМНЕ, СДСМ во само 2.5 години мандат, изградила и рехабилитирала 750 километри патишта, го завршила автопатот Миладиновци-Штип и ги разреши сите недостатоци.
„Откочена е и изградбата на автопатот до Охрид, каде се поправија исто сите грешки и дупки во проектот. Нема пат во земјава којшто не е обновен или веќе во фаза на обнова. За само 2,5 години изградивме 400 километри канализации и водоводи. Извршителу Мицкоски, кога ќе те фатат како препишуваш, се паѓа на испитот. Мицкоски падна на испитот, може да се пријави за 4 години, ако сè уште остане претседател на криминалната ВМРО-ДПМНЕ после поразот на 12 април. Денеска видовме како извршителот на Никола Груевски, Христијан Мицкоски, ја препишува, ја копира програмата на СДСМ за инфраструктурата“, изјави Костадинов.
Мицкоски вети и нов асфалт и целосна реконструкција на 1.000 километри регионални државни патишта, 300 милиони евра инвестиции во изградба на нови водоводи и канализации низ целата држава, набавка на пет нови возови за подобри услови во железничкиот сообраќај и сериозна модернизација на возниот парк.
Костадинов потенцираше дека Мицкоски веќе нема идеја, нема програма, фокусиран е на одбрана на криминалот на Груевски и копира од СДСМ.
„Па згора на сè на прес- конференција реди проекти кои веќе се во реализација, влезени во програмата на Јавното претпријате за патишта.
Ништо не е сменето во ВМРО-ДПМНЕ, тоа е истата нереформирана, заробена партија од Никола Груевски“, изјави тој.
Ваквите препукувања не се новитет и веќе навестуваат каква кампања ќе се води за изборите. Според очекувањата ваквиот политички дијалог само ќе се вжешти со приближувањето на 12 април. Денешното комуницирање на двете најголеми политички партии преку јавноста може да се оцени како увертира во изборниот процес.
Ангела Петровска
