Во врска со претстојните локални избори, министерот за правда Бојан Маричиќ, на гостувањето во ТВ 21 изјави дека нема расположение за одлагање на локалните избори.
Прашан за тоа дали навреме ќе бидат набавени и пуштени во употреба апаратите за отпечатоци од прсти кои беа услов на опозицијата, тој одговори дека е многу посоодветно да се направи и корекција во законот и да се овозможи верификација на идентитетот на гласачот како и досега.
-Всушност го предвидовме и стариот начин на идентификација гласачи, но онаму каде ќе има техничка неможност да се користи фингерпринтот, односно веќе оставивме алтернатива, вели Маричиќ. Тој додаде дека доколку не се стаса за овие, апаратите ќе се употребат за наредните избори.
-Ние на време направивме законска измена и обезбедивме средства како Влада, а сега се е во рацете на ДИК. Мислам дека е можно да се имплементира системот до почетокот на изборите. Ако не, ќе треба да се направи промена во методот на идентификација на гласачот, изјави министерот за правда. Според Маричиќ изборите не треба да се одложат, бидејќи така и мандатите на градоначалниците ќе бидат продолжени, иако досега сме имале такви искуства.
– Државата е подготвена за фер и демократски избори. Во последните четири години имаме успешна слика за тоа како организираме избори, заклучи Маричиќ.
