Онлајн медиумите civilmedia.mk, greencivil.mk, clp.mk, drejt.mk, како дел од медумската платформа на ЦИВИЛ, frontline.mk и уште 62 други онлајн медиуми влегоа во професионалниот регистар што го изработија Советот за етика во медиумите и Здружението на новинари во соработка со Стопанската комора на Македонија.
Овие портали ги исполнија низата критериуми кои беа поставени: импресум и редакција, контакт, почитување на Кодексот на новинари и Статутот на Советот на етика, транспарентност во делот на финансирањето и ги почитуваат авторските права. Покрај овие услови – да бидат регистрирани на мкд домен, комерцијалната содржина да биде видливо означена, а медиумите да имаат еден уредник и минимум двајца новинари.
„Овој регистар не е даден еднаш засекогаш. Ако онлајн медиумите ги напуштат професионалните стандарди, ќе го напуштат и регистарот“, вели Катерина Синадоновска од Советот за етика во медиумите.
„Ова е важен процес за професионализација на фелата и новинарството и демократизација на општеството и тоа значи добро информирани граѓани. Да се прати порака дека ние како фела сме способни да го исчистиме сопствениот двор, дека Владата не треба да кажува што е добро и лошо новинарство. Не се работи за селекција на медиуми по уредувачка политика и став. Имаме шареноликост во новинарски ставови. Основата на целиот регистар е заштита на стандардите на професијата. Новинарството преживува тешки времиња. Ќе успееме да ја вратиме улогата која попатно ја изгубивме да бидеме чувари на јавниот интерес да го информираме граѓанинот“ вели Синадиновска.
Според претседателот на ЗНМ, Младен Чадиковски, овој регистар ќе биде проект што ќе трае и ќе претставува иднината на веб новинарството во земјата. Во овој процес, напомена дека финалната цел е усмерување на бизнис рекламите кон професионалните медиуми.
„Бизнисмените имаат општествена одговорност, бидејќи располагаат со бизнисот и капиталот. Регистарот ќе значи заштита од непрофесионалните медиуми кои шират пропаганда и лажни вести. Бизнисмените, граѓаните, политичарите во следниот период – затрупајте ги со работа и упатувајте преставки до Советот за етика во медиумите, ако ве наклеветил или ги прекршил стандардите“порача Чадиковски.
Како што напоменаа од овие две организации, продолжуваат преговорите и со агрегаторите на вести и тие да бидат дел од проектот, со цел поголем простор да добиваат оние медиуми кои се наоѓаат во регистарот.
Други медиуми кои влегоа во регистарот се веб – изданијата на „Дојде вече“, „Радио слободна Европа“, „Фокус“ „360 степени“, како и порталите „Плусинфо“, „а1он.мк“, „Irl.mk“ итн.
П. К.
