На плоштадот „Македонија“ денеска ќе започне кампањата на Министерството за труд и социјална политика и УНИЦЕФ, со пораката „Дали имате љубов за давање“.
Целта на оваа кампања е граѓаните да станат згрижувачи на деца без родителска грижа и да се мобилизира поддршката за решенија за грижа за деца во семејно опкружување на ниво на заедницата, наспроти институционално згрижување.
По повод на оваа кампања, ЦИВИЛ Медиа сака да потсети на реалната слика која ја живеат многу деца во Македонија, на сите несакани случки во последниве години.
Во 2017 година, податоци токму од УНИЦЕФ, прикажаа дека околу 250 деца во Македонија, од кои 70 се на возраст под 3 години, го немаат правото да живеат во семејна средина, и тогаш се одржа конференција на тема „За секое дете, семејство“, со која се бараа начини за обезбедување услови за секое дете во земјава за да расте во безбедна и грижлива семејна средина.
Се дискутираше за развивањето на системот на згрижувачки семејства, за инвестиции во подобрување на квалитетот на алтернативни решенија за грижа преку нивна стандардизација, вложување во рана детекција и рана интервенција, и вложување во самите деца преку зголемување на инвестициите во предучилишното образование и раниот детски развој.
Истата година, на 20 април, иницијативата „5 до 12“, постави шатори пред Собранието на Македонија и ги објави своите барања од Владата.
Едно од најважните барања за иницијаторите беше во законите за здравствено осигурување и социјална заштита да се избрише старосната граница од 26 години, со која се дискриминирани повозрасните лица со посебни потреби.
Преку 3.000 семејства членови на ова здружение, бараа да се донесе нов закон за децата со посебни потреби и сет мерки, коишто опфаќаат институционална грижа, правилна дијагностика, едуцирани кадри за лекување и соодветена терапија во подобри установи, секако и бенефити за семејствата што ќе овозможат повисок стандард и поквалитетна грижа за децата.
На почетоков на годинава, малолетна девојка, која била штитеничка на државната институција за згрижување деца „25 Мај“ во Скопје, која како последица од сексуално злоставување морала да направи абортус.
„Според нејзиното сведочење пред мониторот за човекови права од ЕЦПР, Р.И. била принудно земена од страна на постар маж од институцијата, кој со возило ја одвел во неговиот дом во друг град. Таму, таа била принудена на сексуални односи и физичка работа. Девојката успеала да избега по еден месец и да се качи во автобус за Скопје, по што полицијата ја пронашла на Бит-пазар. Меѓу другото, таа опишала дека претходно била однесена во „детски летен камп“ во Струга, заедно со други деца од државниот дом за згрижување. Таму, непознат маж сексуално ја злоставувал, пред да биде вратена назад во Скопје. Кога ги пријавила овие злоставувања кај згрижувачите од државната институција, била обвинета дека лаже и дека ги измислува настаните. Потоа, Р.И. била пренесена во друга државна институција за згрижување „Ранка Милановиќ“ во Скопје, каде открила дека останала бремена како резултат на сексуалното насилство.“
Потоа, Министерството за труд и социјална политика соопшти дека до Основното јавно обвинителство ќе поднесе кривична пријава против 11 одговорни и стручни лица од Центарот за социјална работа – Скопје за кривично дело „несовесно работење во служба“ и „запуштање на малолетно лице“, а во врска со случајот на 13-годишното девојче од Домот „25 Мај“.
Кривична пријава за трговија со дете поднесе и Министерството за внатрешни работи против 42-годишна кавадарчанка, во врска со случајот со штитеничката од ЈУ за згрижување деца со воспитно-социјални проблеми „25-ти Мај“.
Злоупотребата на децата не завршува тука. Често децата знаат да бидат искористени и за политички цели, особено пред избори.
Пред изборите во 2017 година, некои политичари посетуваа неколку училишта во Скопје, за да им посакаат добар успех на учениците. Па така, поранешниот градоначалник на Град Скопје, Коце Трајановски, го посети СУГС „Раде Јовчевски-Корчагин“, а поранешниот градоначалник на Општина Карпош, Стевчо Јакимовски, го посети основно училиште „Петар Поп Арсов“, како и поранешниот градоначалник на Општина Илинден, Жика Стојановски, ги ги посети основните училиште „Гоце Делчев“, „Ристо Крле“ и „Браќа Миладиновци“, како и Средното општинско стручно училиште „Илинден“.
За ЦИВИЛ Медиа, граѓански новинар од Гевгелија, ни испрати фотографија како сведоштво за бескрупулозно и отворено користење на малолетниците и децата за партиска пропаганда. На фотографијата се гледа како едно дете држи летоци од една политичка партија.
Денеска е Меѓународен ден на детето, и секоја година се одбележува со различни настани, за да се потсети општеството дека сепак и тие имаат права и мораат да се почитуваат, но реалноста е сосема поинаква. Борбата за целосно почитување на правата на децата мора да продолжи секој ден.
Ангела Петровска
