Денеска, на 24 февруари 2026 година, точно четири години од почетокот на целосната руска воена агресија врз Украина, ЦИВИЛ – Центар за слобода организира меѓународна онлајн конференција со наслов: „Четири години агресија: Отпорот на Украина и одговорноста на светот“. Овој меѓународен настан се одржува во рамките на Глобалната иницијатива за одбрана на демократијата (DDGI) и програмата Вестминстерска алијанса за Украина (WA4U).
Конференцијата се емитува во живо на Јутуб каналот и Фејсбук страницата на ЦИВИЛ, со почеток во 17:00 часот. Во неа учествуваат аналитичари, дипломати, новинари, креатори на политики и претставници на граѓанското општество од Европа и пошироко. Работен јазик на конференцијата е англискиот.
Декларација: повик за одговорност и акција
Во пресрет на конференцијата, организаторите ја објавија Декларацијата за отпорот на Украина и одговорноста на светот, која е отворена за поддршка од организации, медиуми, академската заедница и поединци.
Декларацијата јасно порачува дека Украина не е само жртва, туку и фронт на глобалната борба меѓу демократијата и авторитаризмот. Основачите на Иницијативата бараат мирот мора да биде праведен и заснован на меѓународното право и истакнуваат дека одговорноста за воените злосторства не смее да биде компромитирана. Меѓу другото, во Декларацијата се констатира дека дезинформациите и хибридните закани се директен напад врз демократијата. Во трите стратешки документи што ја придружуваат Декларацијата, особен акцент се става на потребата од долгорочна поддршка — во одбраната, културата и обновата на Украина, како клучни столбови на отпорот и иднината.
Три тематски секции на Конференцијата: реалност, невидлива војна и избор
Програмата на конференцијата е структуирана во три тематски целини:
Реалност: Украина и обликот на војната денес
Фокус на воената и политичката реалност, улогата на Украина како фронт на глобалната борба и цената на отпорот.
Невидливата војна: Дезинформации, хибридни закани и „лажен мир“
Анализа на пропагандата, „двете страни“ наративите и нормализацијата на авторитарни влијанија.
Избор: Што мора да се брани — и од кого
Дискусија за одговорноста на институциите, медиумите, граѓанското општество и граѓаните.
Меѓу говорниците се истакнати експерти и јавни личности од Украина, Германија, Велика Британија, Франција, Литванија, Италија и САД, а ќе биде вклучено и специјално видео обраќање од амбасадорката на Украина во Северна Македонија.
Украина е огледало на светот
Организаторите нагласуваат дека ова не е комеморативен настан, туку повик за јасна позиција.
Украина денес е повеќе од жртва на агресија — таа е огледало во кое се гледа подготвеноста на светот да ги брани слободата, демократијата и човечкото достоинство.
ЦИВИЛ – Центар за слобода
