Министерката Весна Јаневска контра опозиционерката Весна Јаневска, Јаким Неделковски во глувчешка дупка

ДРАГАН МИШЕВ

Министерката за образование и наука, Весна Јаневска, ноншалантно изјави дека не се планира зголемување на платите на наставниците оваа година. Таа, сега од позиција на министерка за образование и наука, без око да и трепне, ќе изјави: Да ја истераме оваа година со таа нивна волја и желба, да придонесат за знаењето на учениците, за напредокот на државата. А она што им следува секако ќе го добијат кога државата ќе може?

Кога државата ќе може? Кога? Откако прво ќе ги подмири трошоците за скапите патувања со бизнис класа на премиерот и свитата?  Или откако ќе ги подмират нереалните ветувања кон пензионерите? Или кога ќе завршат со ребаланс и релокација на средствата за покривање на катастрофалнто работење на Советот и градоначалничката на Град Скопје?

Повисоки плати за наставниците во основните и средните училишта ќе има во 2025…продолжува министерката бесрамно дезавуирајќи го проблемот со тривијални тврдења дека наставниците не биле депримирани само поради средствата со кои се покрива нивниот труд, замислете, имало и многу други елементи кои ги вознемируваат и прават незадоволни. Не, не се тоа средствата за егзистенција и валоризацијата на нивниот труд, туку сега, откако ВМРО – ДПМНЕ се на власт, одеднаш побитни станаа почитта од страна на родителите, почитта од страна на учениците, почитта од страна на општеството итн.

Така зборува Весна Јаневска, министерка за образование и наука.

Заборавила како зборуваше Весна Јаневска, опозиционерката пред 2 години.

Да ја потсетиме со еден принтскрин од нејзина објава на Фејсбум во 2022 година.

Амнезија ли е, склероза ли е во прашање, или селективна меморија, но тогаш на Јаневска малку и беа и 10%, и 15% покачување на платата, туку бараше итно покачување од 18% или ШТРАЈК. Не ја интересираше тогаш ниту напредокот на државата, ниту состојбата на буџетот во услови на светска криза.

И што се случи со хаштаговите: #НаставницитеИмаатКичма и #НаставницитеНеЈаВиткаатКичмата, м? Пукна кичмата кога гордо го уфрлија во избирачката кутија ливчето со заокружен број 2?

А кога веќе некој спомна штрајк, го видел некој деновиве претседателот на СОНК, Јаким Неделковски. Да, да, оној истиот Јаким кој додека сегашнава министерка беше опозиционерка, ревносни ги спроведуваше нејзините насоки, па нема, нема, ќе ги извадеше послушните наставници на штрајк, на штета на учениците, квалитетот на нивното образование и заканувајќи се на регуларноста на учебната година.

Сега само тивко, „да не таласа“ затскриен зад тастатурата, во објава на неговиот фејсбук-профил, Јаким  го информира членството на СОНК и останатата заинтересирана јавност дека содржината на изјавата на министерката Весна Јаневска не е договорена со СОНК и воедно го замолува членството на СОНК да не подлегнува на смислена провокација и обид за разбивање на единството во СОНК од поединци и групи, се со цел за нивно лично или колективно профитирање. Со други зборови, штрајк не доаѓа предвид, членството треба да остане мирно и летаргично до некоја повторна средба со надлежните во државата и решавање на настанатата ситуација.

Или додека неговата шефица, Весна Јанева не порача нешто друго. А ако се земе предвид изјавата на премиерот кој ги повика синдикатите да не бараат зголемување на платите, откако овие едвај се осмелија да се појават на прес конференција со своите барања, бидејќи така ќе наседнеле на политичка кампања на СДСМ, се чини дека Јаким уште долго ќе седи сокриен во глувчешка дупка.

---

Текстот е личен став на авторот