Новата српска влада, што треба да се формира по денешните избори, ќе биде 18-та по ред од воведувањето на повеќепартискиот систем во државата во 1991 година и дванаесетта по демократските промени во 2000 година, пишува денеска N1.
Изминатите шест влади мнозински ги сочинуваше Српската напредна партија, која секојпат за свој коалициски партнер ја избираше Социјалистичката партија на Србија.
Од 1991 до 2023 година, само еден премиер имал три последователни влади, а тоа е актуелната премиерка Ана Брнабиќ. На чело на владата е шест години – од 2017 година.
Четворица премиери имаа по два последователни мандата – Мирко Марјановиќ од 1994 до 1998 и од 1998 до 2000 година, по октомвриските промени тоа беше Воислав Коштуница од 2004 до 2007 година и од 2007 до 2008 година. Потоа, Александар Вучиќ беше на чело на владата од 2014 до 2016 година и повторно до 2017 година, кога беше избран за претседател на државата.
Најдолго траеше првата влада на Мирко Марјановиќ и владата на Мирко Цветковиќ предводена од Демократската партија (2008-2012), по четири години.
Во повеќе од 30 години повеќепартизам во Србија, низ владите поминаа неколку стотици луѓе на премиерски функции, потпретседатели и министри, од кои многумина беа на исти или слични функции повеќе пати.
По 2000 година рекордер со 13 години „министерување“ е Расим Љајиќ, кој беше министер во шест влади – министер за труд (2007-2008, 2008-2012) и министер за трговија и телекомуникации (2012-2014, 2014-2016, 2016-2017, 2017-2020).
Со 11 години министер и две години премиер, е лидерот на социјалистите Ивица Дачиќ. Прво како министер за внатрешни работи од 2008 до 2012 година, потоа беше премиер од 2012 до 2014 година, веднаш се пресели на функцијата министер за надворешни работи до 2020 година, а по минатогодишните избори се најде на истата позиција.
По него е Зорана Михајловиќ, која беше министерка вкупно 10 години, во пет мандати.
Г. Т.
