Министерот за транспорт и врски, Горан Сугарески, утрово оствари средба со Синдикатот на машинскиот персонал во „Македонски железници“, како и со генералниот директор на МЖ „Транспорт“ АД Скопје, откако дел од МЖ „Транспорт“, утрово повторно ја прекина својата работа.
Во соопштението од Министерството за транспорт и врски се вели дека на средбата се разговарало за настанатата состојба со доцнењето на платите, како и за другите барања на Синдикатот при МЖ „Транспорт“ Скопје.
Министерот Сугарески изразил разбирање за настанатите ситуации во компанијата и најавил дека во најкратко време ќе се разгледаат сите законски можности за решавање на истите, како и долгорочно решавање на состојбите во железничкиот сообраќај во Република Македонија.
Од утрово од 7 часот, машинскиот персонал на МЖ „Транспорт“ го стартуваше највениот штрајк. Неисполнетите ветувања на в.д директорот, Игор Коруновски се причина железничките работници да не ги извршуваат работните обврски.
Во знак на протест поради доцнењето на исплатата на платата и селективното зголемување нна платите само за дел од вработените, Душко Чакаровски претставник на Машинскиот персонал бара зголемување и урамнотежување на коефициентот на сите машинисти, процентите на додатокот на плата за работа ноќно време и работа за време на викенд и празници, кои им се одземени пред десет години.
Вработените бараат исплата на вториот дел од априлската плата и плата за мај, како и изготвување правилник за вреднување на работните места.
Денеска ќе бидат пропуштени само возовите за Битола во 14 часот и за Гевгелија во 16.55 часот, како и меѓународните Белград-Скопје-Солун, како и Солун-Скопје-Белград.
М. И.