Откако членот на Комисијата за историски и за образовни прашања помеѓу Македонија и Бугарија, Ванчо Ѓорѓиев, поднесе оставка и обвини за притисок и мешање во работата на комисијата од страна на функционер од МНР неговата изјава беше демантирана од институциите, но и од останатите членови на комисијата.
Останатите членови од македонскиот дел на Комисијата за историски и образовни прашања се изненадени од оставката и тврдењата на Ѓорѓиев и потенцираат дека научните принципи во работата на Комисијата биле, се, и ќе останат непроменети и дека не постои никаква основа да се тврди дека постои нов принцип на работа, ниту политички притисок од МНР, Владата или политичките партии.
Демант пристигна и од Владата и Министерството за надворешни работи, кои негираат дека некогаш се мешале или имале какво било политичко влијание во работата на комисијата. Од Владата соопштија дека Ѓорѓиев пред една недела со слободна волја го потпишал договорот за продолжување на неговиот ангажман како член на Комисијата.
Од друга страна, вендаш по оставката на Ѓорѓиев, со изјава излезе Христијан Мицкоски, кој ги повика и останатите членови на Комисијата да си поднесат оставки, бидејќи како што рече, некој меѓу двата изборни круга одлучува да распродава дел од македонскиот идентитет и да ја продава Македонија.
По изјавата на Мицкоски, во јавноста и медиумите се појавија прашања околу тоа дали можеби со ова се прави обид да се креира скандал каде што тој реално и не постои и дали целта е да се поткопаат преговорите со Бугарија, како и интегративните процеси за пристапаување во ЕУ.