ВЕСТ НА ДЕНОТ
МНР и МО одговорија на изјавата на портпаролката на руското МНР, Захарова: Северна Македонија е суверена држава која одлуките ги носи самостојно
Република Северна Македонија е суверена држава која одлуките ги носи самостојно водејќи се од принципите на почитување на меѓународното право, Повелбата на ООН, принципите и заложбите на ОБСЕ за заштита на европската безбедносна архитектура и глобалната стабилност.
Северна Македонија уште од самиот почеток ја осуди воената интервенција во Украина и застана во поддршка на територијалниот интегритет, суверенитет и независнот на Украина, а пред се во поддршка на мирот, човековите права и меѓунаордниот поредок заснован на правила. Имено, досега, Владата на Република Северна Македонија донесе неколку Одлуки за воено – техничка помош со кои и помагаме на Украина во одбрана на својот територијален интегритет кој е загрозен од воената интервенција.
Република Северна Македонија како членка на најмоќниот воено – политички сојуз – НАТО Алијансата, одлучно стои зад позицијата и решителноста на Алијансата да биде гарант на мирот и безбедноста на своите земји – членки и да ги штити вредностите, слободата и безбедноста на сегашните и идните генерации, стои во заедничкото соопштение на МНР и МО кое се однесува на изјавата на портпаролката на руското МНР, Марија Захарова дека Русија смета дека е голема грешка одлуката на властите на Северна Македонија да и донираат на Украина тенкови Т-72.
ИЗЈАВА НА ДЕНОТ
Анастасовски: Навивачките групи се во тесна спрега со политичките врвови
Веќе е изгубена суштината на поддршката и бодрењето на клубот за кој се навива, бидејќи преку спортските натпревари (Лига на шампиони или Куп на УЕФА) најлесно може да се испрати вербална (аудио) порака или говор на омраза кон друга етничка заедница, или да се упати политичка порака /провокација, вели проф. д-р. Иван Анастасовски, за ЦИВИЛ Медиа.
ФЛЕШ ВЕСТИ
ОБРАЗОВАНИЕ Грковска и група средношколци симулираа владина седница: Праведна држава со нулта толеранција за корупцијата, квалитетно образование и ефикасно здравство се областите за кои треба брза акција.
ХОЛОКАУСТ Претседателот Стево Пендаровски по повод 2 август – Европскиот ден на сеќавање за холокаустот врз Ромите ја упати следната порака: Ромскиот народ е нераскинлив дел од македонскиот општествен мозаик кој ги споделува стремежите и жртвите во борбата за слободно општество. Таа коегзистенција треба да продолжи во духот на солидарноста, хуманоста и меѓусебната почит, истакна Претседателот.
Европската унија денеска апелираше тензиите околу посетата на претседателката на Претставничкиот дом на САД, Ненси Пелоси, на Тајван да се решат со дијалог и каналите за комуникација со Кина да останат отворени, за да се избегне „опасноста што може да произлезе од погрешна проценка“, пренесува МИА.
ВОЈНА ВО УКРАИНА
Генералниот директор на Меѓународната агенција за атомска енергија (МААЕ), Рафаел Гроси денеска изјави дека најголемата европска нуклеарна централа во Украина, Запорожје е „целосно вон контрола“ и Русија и Украина мора итно да дозволат експерти да го посетат комплексот со цел да се стабилизира ситуацијата и да се избегне нуклеарна катастрофа, пренесува МИА.
*
Важна цел за Украина е да обезбеди регуларност на снабдувањето со жито за извоз, изјави претседателот Володимир Зеленски во своето видео обраќање во вторникот навечер. Тој истакна дека првиот брод со украинско жито пристигна на Босфор, минувајќи низ специјален коридор во Црното Море, со кој беше договорено да се деблокираат нашите пристаништа.
*
До први август 2022 година, од почетокот на руската инвазија на Украина,загинале 358 деца, а повеќе од 693 деца се повредени. Поради активните воени дејствија во погодените региони, не постои можност за увид во областите на гранатирање и уништување.
Од 24 февруари досега, 183 верски објекти во 14 региони на Украина се целосно уништени или оштетени во различен степен.
*
Шефот на полската дипломатија Збигњев Рау денеска во Жешов на југот на Полска, по враќањето од Украина, информираше дека и покрај противењето на Русија, ОБСЕ ќе продолжи со присуството во Украина и дека е постигнат договор со украинските власти за продолжување на мандатот на мисијата.
*
Пентагон во вторникот ги демантираше руските тврдења дека уништиле шест ракетни системи ХИМАРС од американско производство од почетокот на конфликтот во Украина, пренесува Укринформ, повикувајќи се на Ројтерс.
СЛОБОДНА ЗОНА
Во име на слободата на говор и заштита на истата, слободно зборувајте во свое име, без заштита и без покритие, без лажен ексклузивитет, и без „одбрана на истиот“, затоа што секако на лично ниво, „народот“ е апстрактен колку што е апстрактна и лажната грижа за него. Нешто слично како и грижата за граѓаните, со таа разлика што на граѓаните како индивидуалци со сопствен став, не им треба ничија „света одбрана“. Им треба организиран и функционален систем, со права и одговорности. А, народот? Па, народот е секој од нас, колку што сме и ние дел од народот. Ама, како поединци, а не како маса, пишува Никица Корубин во колумната „Во името на народот“.
