Евгенија Гутул, шефицата на молдавскиот регион Гагаузија, беше приведена на аеродромот во Кишињев вечерта на 25 март при обид да ја напушти земјата, објави молдавскиот сервис на Радио Слободна Европа/Радио Слобода, пренесува Кијив Индипедент.
Според обвинението, Гутул е вмешана во случајот со нелегалното финансирање на забранетата проруска партија Шор. Антикорупциското обвинителство на Молдавија објави дека завршило со собирањето докази.
Молдавските власти тврдат дека таа систематски внесувала средства од Русија во Молдавија додека служела како секретарка на партијата, работејќи со организирана криминална група.
Гутул, избрана за гувернерка на Гагаузија во јули 2023 година како кандидат на партијата Шор, одржува врски со Москва. Таа отпатува во Русија во март 2024 година, каде што се сретна со рускиот претседател Владимир Путин и присуствуваше на Меѓународниот економски форум во Санкт Петербург во јуни.
Инспекторите, исто така, го обвинуваат Гутул дека помогнала да се организираат антивладини протести во Кишињев во есента 2022 година. Таа ги негира обвиненијата, нарекувајќи ги политички мотивирани.
Русија ги осуди постапките на молдавските власти, обвинувајќи го Кишињев за непочитување на „принципите на политичкиот плурализам и демократијата“, изјави портпаролот на Кремљ, Дмитриј Песков. Групите за човекови права ја обвинија Русија за систематска репресија на граѓанското општество, политичката опозиција и слободниот печат дома.
САД воведоа санкции против Гутул на 12 јуни 2023 година, поради нејзините врски со прорускиот олигарх и политичар Илан Шор, кој побегна од Молдавија во 2019 година и беше обвинет за обид за дестабилизација на земјата.
Молдавската претседателка Маја Санду, проевропска лидерка, одби да ја одобри Гутул за член на владата, наведувајќи ги обвинувањата за купување гласови.
Гагаузија е автономна територија во јужна Молдавија која делумно се граничи со украинската област Одеса. Традиционално се залага за поблиски односи со Русија, додека се спротивставува на интеграцијата во ЕУ.
Кишињев активно се спротивстави на руското влијание, протерувајќи десетици руски дипломати и персонал од амбасадата во јули 2023 година поради загриженост за шпионажа.
Тензиите дополнително ескалираа откако Кишињев рече дека руските беспилотни летала постојано го нарушувале молдавскиот воздушен простор за време на воздушните напади врз Украина, при што некои од беспилотните летала паднале на територијата на Молдавија.
Д. Мишев
