Минатата вечер во фокусот на јавноста беше потенцијалната опасност од тероризам. Како што соопшти Министерството за внатрешни работи, по претходно разменети оперативни сознанија со партнерска земја, во врска со потенцијални планови и намери за извршување на терористички акт на територијата на Северна Македонија од припадници на радикални структури поддржувачи на ИСИС.
МВР спроведе оперативно-тактички мерки со цел идентификација на можните организатори, логистичари и потенцијалните извршители на нападот.
„Со цел попречување на терористичкиот напад и остварување на превентивната функција, Министерството за внатрешни работи изготви план на мерки и активности, за што обезбеди соодветни наредби за нивно спроведување. По добиените наредби на неколку локации на територијата на државата извршени се претреси при што се одземени предмети и уреди кои се поврзани со можниот напад. Министерството за внатрешни работи продолжува да спроведува дејствија, мерки и активности со кои се работи на осигурување на безбедноста на граѓаните“, се вели во вчерашното соопштение на МВР.
Час потоа реагираше и Американската амбасада во Скопје со предупредување на можни терористички напади во Македонија од припадници на ИСИС. Како можни цели од амбасадата наведоа дека се трговските центри и места каде има поголема фреквенција на луѓе. Од амбасадата објавија дека нападите може да бидат и со лесно оружје, пиштоли и слично.
Во медиумите се шпекулира дека МВР уапсила 20 припадиници на ИСИС. Според неофицијални информации полициската акција била изведена вчера околу 5 часот наутро во повеќе градови во земјава и зпаленила големо количество на пешадиско оружје.
Уште нема точни информации каде точно се очекувал нападот. Од МВР најавуваат дека во текот на денешниот ден ќе имаат повеќе информации за јавноста.
Б. Ј.