Член 8 од Универзалната декларација за човековите права: „Секој има право националните судови ефикасно да го заштитат од кршење на основните права кои му се признати со уставот и законите.“
Граѓан(к)ите кои сметаат дека со одлука на суд или друг државен орган му е нанесена неправда, може да ја нападне таа одлука, барајќи истата да биде повторно испитана од суд или надлежен државен орган од повисока инстанца.
Тоа практично се остварува преку поднесување на жалба, со која лицето кое смета дека му е повредено некое фундаментално право го изразува своето незадоволство од одлуката.
Жалбата е еден од најосновните и најважните начини преку кои граѓаните можат да ги заштитат своите права пред државата и мора да биде фактички и правно заснована и јасно да укажува на пропустот направен од првостепениот орган.
Тој процес ќе донесе резултат само ако биде разгледувано од непристрасен и независен државен орган, кој ќе работи според уставот и законите.
Во последниве години сведоци сме на една различна слика за независноста на судството во државава, и често судовите се подложни на корупција и притисок од различни групи или поединци.
Граѓан(к)ите да се информираат за нивните права и да дознаат што повеќе за начинот на кој може да се заштитат! Да се искористат можностите кои ги пружа законот.
Секој ден е ден на човековите права. Затоа, ЦИВИЛ – Центар за слобода иницираше Месец на активизам за човековите права во текот на декември, под слоганот „Слобода, правда, еднаквост“.
ЦИВИЛ во декември ќе организира и повеќе настани во кои ќе се говори за важни општествени и политички теми. Во понеделник, 10 декември започнува дводневниот мултимедијален хепенинг ЦИВИЛ ФЕСТ што ќе се одржи во Младински културен центар. Фестивалот се совпаѓа со Меѓународниот ден на човековите права и 70-годишнината од донесувањето на Универзалната декларација за човековите права, како и со 19-годишнината од формирањето на ЦИВИЛ.
ЦИВИЛ – Центар за слобода ги поканува сите граѓанки и граѓани, поединците, групите, организациите и иницијативите во граѓанското општество да се придружат кон Месецот на активизам за човекови права испраќање порака за поддршка и информација, фотографија, видео или селфи за кршење на човековите права и слободи.
