По постигнувањето на Договор за проблемот со името меѓу Македонија и Грција повторно се разгореа страстите во јавноста. Нови протести, партиски препукувања, говор на омраза и само уште една причина за поделба на граѓаните…
Претставниците на народот, колку и да се разликуваат во нивните ставови и перцепции за напредокот на Македонија, во овој договор, наоѓаат само уште една причина за партиски пресметки, политички поени и секојдневно труење на јавноста со обвинувања и сомнежи. Приказната за патриотите и предавниците се чини како никогаш да нема да заврши.
По протестот на 23 јуни, кој започна во 20 часот пред Собранието на Македонија, кој според социјалните мрежи беше организиран од Млади за Македонија, беше нападнато седиштето на ВМРО-ДПМНЕ и исфарбано со црвена и жолта боја.
Генералниот секретар на ВМРО-ДПМНЕ, Игор Јанушев, по инцидентот кој се случи таа вечер, на прес-конференцијата која ја одржаа ВМРО-ДПМНЕ по полноќ, изјави дека нападот на ВМРО-ДПМНЕ е акт на насилство и вандализам, но и напад на сите оние кои ги штитат Македонските национални интереси. Тој додаде дека одговорноста за ваквиот напад се структури блиски до власта, по принцип на шарената револуција.
„Веќе подолг период ВМРО-ДПМНЕ предупредува дека власта предводена од Зоран Заев готви насилно сценарио спроведувано од свои инсталации и полициски структури чија цел е да го втурне ВМРО-ДПМНЕ во насилство како би можело полесно да се делегитимира нашата борба против капитулацијата на Зоран Заев со договорот за името. Власта преку овие и слични провидни провокации посакуваат нов 27 -ми април, каде Зоран Заев би се прикажал за жртва, а ВМРО-ДПМНЕ би била оцрнета.“ додаде Јанушев.
Истиот ден и СДСМ излезе со соопштение дека го осудуваат нападот врз централниот штаб на ВМРО-ДПМНЕ, и дека СДСМ не може да биде виновен за поделбите во опозициската партија.
„Очекуваме сите надлежни институции, согласно нивните законски надлежности, да го расчистат овој случај. ВМРО-ДПМНЕ мора конечно да ја напушти поразената матрица на конфликт, деструкција и поделби, да покаже елементарна политичка одговорност и во интерес на граѓните да се одлучи ЗА македонската иднина.“ стои во соопштението на СДСМ.
Јавноста е навикната на ваквите „препукувања“ на најголемите партии во Македонија, па така, и денес пристигнаа нови обвинение и одбрана од двете страни.
ВМРО-ДПМНЕ ја обвини Владата на СДСМ дека со еден потпис на договорот со Грција, се откажува од се што е македонско, а тие во одбрана дека и при јавно објавен договор, опозицијата се дрзнува да ја лаже јавноста и дека македонските топоними не се забрануваат.
„Ваквиот капитулантски договор под покровителство на Заев и Димитров атакува на македонското културно наследство, државност и суверенитет, прикажувајќи ја Македонија како целосно нова вештачки измислена творба. Иако тоа не беше дел од преговорите, сега по волја на Коте Заев, од македонската меморија ќе треба да се избришат Солун, Кукуш, Лерин. Тие ќе исчезнат од македонските учебници, македонските патокази и од сите документи. Македонија ќе биде обврзана да ги користи грчките топоними, кои насилно биле наметнати. Откажувањето од географските поими значи бришење на дел од културата и историјата на еден народ.“ стои во соопштението на ВМРО-ДПМНЕ.
Од друга страна, во денешното соопштение на СДСМ стои „Во договорот јасно стои дека приоритет им се дава на ендонимите, наместо егзонимите и тоа важи подеднакво и за двете страни. Приоритет на едно не значи забрана за друго. Со тоа се обезбедува чисто и соодветно решение согласно меѓународните стандарди. Договорот предвидува и формирање на Заеднички комитет кој ќе работи во согласност со начелата и целите на УНЕСКО и Советот на Европа, а неговото делување исто така ќе важи за двете страни подеднакво.“
И додека двете најголеми политички партии во земјава залудно го трошат времето на дневно-политички обвинувања и објаснувања, граѓаните на Македонија, сè уште не чувствуваат никакви општествени промени. Здравството тоне се подлабоко. Социјални трагедии на секој чекор. Дури и образованието учествува во процесите на поделба и сегрегација. Опозицијата упорно од петни жили се труди да го закочи секој процес кој е во насока на подобрување на состојбите во општеството. А власта, пак, се чини троши премногу енергија на она што се случува надвор од земјата, оставајќи ги своите граѓани во втор план.
Ангела Петровска
