Делегацијата на Европската унија во Македонија ги додели наградите за истражувачко новинарство за 2016 година. Жирито предводено од Марина Тунева, наградата за најдобра истражувачка сторија за 2016 година му ја додели на новинарот Александар Димитриевски за сторијата „Субвенции за растително и сточарско производство“, објавена на истражувачката мрежа „Призма“. Второто место му припадна на Зоран Јовановски за сторијата „Пеплишта на смртта“, објавена во емисијата „360 степени“ на ТВ Алсат-М.
Наградата за најдобра сторија на млад новинар, делегацијата на ЕУ ѝ ја додели на Славица Филиповска за темата „Бугарски пасоши за ‘чиста’ Македонија“, објавена во емисијата „360 степени“ на ТВ Алсат-М.
„Чест ми е што го добивам ова признание. Работам како новинар три ипол години, но имав среќа тоа да биде во два слободни медиума. Сторијата за бугарските пасоши ме исполни професионално, како новинар, заради начинот на кој ја изработивме со тимот, но и заради одѕивот во јавноста. Како граѓанин на Македонија се почувствував поразено кога ги видов тие редици од млади луѓе кои аплицираат за бугарско државјанство и тоа не заради лични амбиции и напредок во животот, туку за гола егзистенција во развиените земји“, изјави за ЦИВИЛ Медиа, новинарката Филиповска.
Шефот на делегацијата на ЕУ во Македонија, Самуел Жбогар, при доделувањето на наградите рече дека новинарите трпат големи притисоци на работното место, имаат мали плати, но, сепак, си ја вршат својата работа – професионално и објективно.
„Во име на ЕУ, сакаме да им искажеме почит за работата и за борбата за вистината. Новинарите играат корективна улога во општеството, а истражувачкото новинарство се бори против корупцијата и организираниот криминал. Им благодариме на сите новинари за нивната макотрпна работа“, рече Жбогар.
Наградата на ЕУ за истражувачко новинарство се доделува трета година по ред, а за 2016 година беа пријавени 26 автори со 32 стории.
Д. М.
