Манипулирањето со јавното мислење преку платформите на социјалните медиуми се јавува како суштинска закана на јавниот живот. Низ светот, владини агенции и политички партии ги експлоатираат платформите на социјалните медиуми за ширење сензационални вести и дезинформации, спроведуваат цензура и контрола и ја поткопуваат вербата во медиумите, јавните институции и науката.
Еден извештај од Оксфордскиот институт за интернет (ОИИ), објавен во јули минатата година, а кој и денес е актуелен, покажува дека и покрај напорите за борба против компјутеризираната пропаганда, проблемот расте во големи размери.
„Бројот на земји во кои се јавува формално организирана манипулација со социјалните медиуми е значително зголемен, од 28 на 48 земји, на глобално ниво“, изјавува Саманта Бредшо, ко-автор на извештајот. „Поголемиот дел од порастот потекнува од политички партии кои шират дезинформации и сензационални вести околу периодите на избори. Постојат повеќе политички партии кои учат од стратегиите развиени во текот на Брегзит и претседателските избори во САД во 2016 година: сé повеќе кампањи користат ботови, сензационални вести и дезинформации да ги поларизираат и манипулираат гласачите.“
Ова се случува и покрај напорите од страна на владите во многу демократии, кои воведуваат нови законодавства, дизајнирани за борба против лажните вести на интернет. Проблемот со ова е тоа што овие „работни групи“ за борба против лажните вести се користат како нова алатка за легитимизирање на цензурата во авторитарните режими“, вели проф Фил Хауард, ко-автор и главен истражувач на проектот за Компјутеризирана Пропаганда на ОИИ. „Во најдобар случај, овие видови на работни групи создаваат контра-наративи и градат алатки за граѓанска свест и проверување на факти.“
Друг предизвик е еволуцијата на медиумите што поединци ги користат да споделат вести и информации. „Постојат докази дека дезинформациските кампањи се преместуваат на чат апликациите и алтернативните платформи“, вели Бредшо. „Ова станува сé почесто во глобалниот југ, каде што се попопуларни големи јавни групи на чат апликации.“
Автоматизираните бот профили се сé уште добро користена тактика. Онлајн коментатори и лажни профили се користат за да се шират про-партиски пораки, како и за стратешко споделување или објавување на содржини користејќи клучни зборови за да ги изиграат алгоритмите и одредена содржина да се најде на трендинг. Исто така, се користат и за да се известува за легитимни содржини и профили на големи размери, што води кон нивно привремено бришење. „Ние сметаме дека нови иновации ќе продолжат да се појавуваат како платформи, а дека владите ќе преземаат правни и регулаторни чекори да се намали овој тип на активности“, вели Хауард.
Генерално, користењето на кампањи за организирана манипулација на социјалните медиуми е голем бизнис. „Ние оценуваме дека десетици милиони долари се трошат на ваков тип на активност“, вели Хауард. „Дел од парите можеби се троши на легитимно рекламирање на социјални медиуми, но секако постои растечка индустрија за лажни профили, онлајн коментатори и политички ботови.“
извор: Оксфордски институт за интернет
превод: Наташа Цветковска/ЦИВИЛ
