Синдикатите на УПОЗ, СИЕР, УТКОЗ, АГРО објавија соопштение во кое безрезервно ги поддржуваат вработените од „Утрински весник“, „Вест“ и „Дневник“, како и вработените во „Македонски железници“, кои деновиве штрајкуваат поради задоцнетите плати.
„Наспроти сé поголемото работничко незадоволство, Сојузот на синдикатите и Кофедерацијата на самостојните синдикати на Македонија, во целиот изминат период, а и досега, се само неми посматрачи на сите штрајови и не се осмелија макар и декларативно да искажат поддршка на штрајкувачите. Но, затоа, тие во изминатиот период како најголеми синдикални организации во Македонија беа само верни слуги на власта, афирмирајќи ги нивните закони и наводниот социјален дијалог во Македонија, кој според нив е на највисоко ниво. Како резултат на нивната пасивност и поданички однос кон власта и работодавачите, од ден на ден, работничкото незадоволство во Македонија е сé поголемо. Па така, наместо работниците да штрајкуваат за поголеми права, тие се приморани да штрајкуваат за исплата за плати, за она што чесно го заработиле“, пишуваат синдикалните организации кои раководството на Сојузот на сидникатите ги исклучи од членството.
Четирите синдикати истакнуваат дека неисплатените плати се резултат на лошото менаџирање на компаниите кои се заинтересирани само за нивниот профит, а платите и другите права од работен однос, им се во втор план. Предупредуваат дека незадоволството кое е наталожено со години, може да прерасне во општо работничко незадоволство на повеќе синдикати.
„Игнорантскиот однос на менаџментот во изданијата на ‘Медија Принт Македонија’ и Јавното претпријатие ‘Македонски железници’ кои одбиваат да разговараат со штрајкувачите, уште повеќе го поттикнува револтот кај штрајкувачите кои не можат да го остварат заработеното. Четирите синдикати УПОЗ, СИЕР, СУТКОЗ и АГРО Синдикатот, како предводници и предвесници на новото синдикално движење во Македонија, со уште неколку синдикати кои во изминатиот период низ протести и штрајкови се борат за поголеми права на своите членови, подготвени се солидарно да се вклучат во остварувањето на нивните барања за исплата на платите на Самостојниот синдикат на новинарите на Македонија и Синдикатот на МЖ – Инфрастуркутра и Независниот синдикат на машинскиот персонал, и да им пружат секаква помош, правна, финансиска и друга“, се вели во соопштението на УПОЗ, СИЕР, СУТКОЗ и АГРО Синдикат.
Овие четири синдикати вчера добиле дојава дека нивните канцеларии се обиени, а нивните работи изнесени од зградата на ССМ, со што повторно ѝ отворија работа на полицијата!
Додека претставниците на овие четири синдикати го обвинуваат лидерот на ССМ Живко Митревски, тој опстојува на ставот дека синдикалците се легитимно отстранети од зградата.
