Вистиномер рецензираше пост на социјалната мрежа Фејсбук, во кој авторот тврди дека 15 потполно вакцинирани тенисери не успеале да го завршат „Мајами Опен“, поради здравствени проблеми предизвикани од вакцините. Ова е невистина.
Во објавата пишува:
ПАЃААТ КАКО КРУШКИ…
Петнаесет „целосно вакцинирани“ играчи не успеаја да го завршат Мајами опен!
Љубителите на тенисот се бесни, а светот на спортот е во шок по невидениот број играчи, кои се повлекоа за време на натпреварот или претходно беа откажани на овонеделниот Мајами опен. Вкупно 15 играчи не успеаја да го завршат турнирот, вклучувајќи ги и фаворитите за победа. Free West Media известува:Светот на тенисот беше шокиран кога фаворитите Паула Бадоса и Јаник Синер се пензионираа за време на четвртфиналето на Мајами опен. Бадоса, која наскоро ќе биде на 3. место на светската ранг-листа, се чувствуваше непријатно за време на натпреварот против Џесика Пегула и го напушти теренот во солзи.
Авторот пишува дека станува збор за 15 тенисери, а во веста која ја споделува, повикувајќи се на познати антиваксерски портали, конкретно се опишува здравствената состојба на двајца тенисери, односно за Паула Бадоса и Јаник Синер. Двајцата имале здравствени проблеми, но не како последица на вакцината, туку Бадоса имала вирусна инфекција на грлото и увото, а Синер плускавци на стапалото.
„Евро спорт“ пренесе дека Јаник Синер се здобил со плускавци на стапалото за да му го даде на Фран Серундоло првото место на последните четири од еден Мастерс турнир, додека Паула Бадоса не можеше да се избори со инфекцијата што ја почувствува во претходниот круг, давајќи ѝ на Џесика Пегула да помине на полуфиналето финале.
AS.com објави дека Бадоса имала инфекција на грлото и увото.
Пaула Бадоса оваа среда се прости од Мајами на најлош можен начин. Шпанката мораше да си замине кога загуби со 4-1 од Џесика Пегула во четвртфиналето. Таа веќе се чувствуваше лошо во осминафиналето против Чехинката Фрухвиртова, но откако и дадоа апче успеа да дојде до победата. Како што дознава AS.com, таа ималa инфекција на грлото и на увото, пренесува Ас.ком.
Впрочем и шпанската тенисерка на својот профил на Твитер напиша дека се повлекува од здравствени причини, но никаде не споменува компликации, ниту поствакцинални проблеми од типот отежнато дишење и болка во градите, како што лажно тврди авторот на постот.
Многу ми е жал што морав да се повлечам денес. Многу страдам од последниот натпревар поради здравствени причини. Се обидов да се опоравам, но беше невозможно. Ќе ми требаат неколку дена да се опоравам и да се подготвам за сезоната. Ви благодарам многу, напиша Бадоса.
Исто и италијанскиот тенисер на својот официјален профил на Твитер потврди дека имал здравствени проблеми со нозете и дека се подготвува за следен настап.
Не беше лесно да се повлечеш во Мајами. Беше малку тежок месец со мојата болест во Индијана Велс, и сега ова. Ги одвоив последните неколку дена да се одморам и да добијам совет за моите нозе. Се надевам дека ќе бидам подготвен за Монте Карло, напиша Синер.
Истите информации ги пренесоа и медиумите, повикувајќи се на официјални извори.
Официјалните лица рекоа дека Бадоса има вирусна инфекција, додека Синер плускавци на стапалата. И двајцата беа фаворити за напредување и се повлекоа со негатива од 4-1 во првиот сет од нивните соодветни натпревари, пренесуваат медиумите.
На официјалната страница на „Мајами Опен“ не е пријавено дека повеќе тенисери се откажале и испаднале од игра поради здравствени проблеми, како што лажно се тврди во постот.
Нигде во светските медиуми,( Би-би-си, Си-ен-ен) кои известуваа за „Мајами Опен“ во рубриката „тенис“ нема таква „бомба вест“, која ја споделува авторот.
Колумнистот Џери Агар објави дека оваа вест е лага, посочувајќи ја како еклатантен пример за ширење лажни вести.
„Лажните вести“ се загрижувачки проблем денес. Се надеваме ова е поучен пример, се врти приказна дека медиумите го прикриваат „фактот“ дека невиден број тенисери се повлекле од Мајами Опен, кои страдаат од компликации од вакцината против ковид-19. Оние што шират вакви приказни контактираат со луѓе како мене, велејќи: „Зошто не ја правиш домашната задача и не ја известуваш вистината?“ Добри вести. Тоа е она што го правиме. Токму затоа јас и останатите медиуми не ја пренесуваме ужасната вест за Мајами Опен. Ја завршивме домашната задача. Еве го алармантниот наслов: „Скриена бомба: Светот на тенисот се потресе бидејќи ПЕТнаесет „целосно вакцинирани“ играчи не можеа да го завршат опенот во Мајами“. Доволно е лесно да се погледне не само колку се повлекле, туку и кој и зошто, пишува Агар.
Впрочем антиваксери истата „приказна“ ја ширеа и во јануари годинава за „Австралија Опен“. Тогаш пишуваа дека тројца тенисери испаднале од Австралија Опен 2022 поради умор и проблеми со дишењето.
Проверувачите на факти на Ројтерс ја дебанкираа оваа вест како лага.
Поради сите изнесените факти оваа објава ја квалификуваме како невистинита.
