Во рамките на проектот „Европа е наш дом“, минатата недела ЦИВИЛ одржа брифинг за претставниците на медиумите , во просториите на Редакцијата „Слободен печат“. На брифингот стана збор за проектот на ЦИВИЛ кој се спроведува со цел да се поддржат ЕУ интегративните процеси на земјата, да се промовираат европските вредности, како и вклучување во борбата против хибридните закани против демократијата.
Кажете го своето мислење: Кои се вашите барања од новата влада?
ЦИВИЛ во новата акција ги повикува сите свои членови и поддржувачи, соработници сите граѓанки и граѓани да ги споделат своите очекувања, предлози и барања за идната Влада на Република Северна Македонија. Оваа најнова акција го носи називот: „Граѓански форум за учество во креирање на владините политики“.
Најдобрите прилози ќе бидат објавени, а авторите на најквалитетните текстуални и видео прилози ќе добијат и паричен надоместок (хонорар), соодветно на проектните и буџетските можности на организацијата.
Каква влада очекувате да формира мандатарот? Што треба да направи владата, каква програма треба да донесе? Што им е најважно на граѓанките и граѓаните? Како да се оствари тоа?
Сите се поканети да учествуваат и да дадат предлози во областа на човековите права и слободи, правосудството, меѓуетничките и меѓуверските односи, изборниот систем, социјалната правда, образованието, здравството, културата, економијата, евроатлантските процеси, меѓународните односи, дијаспората, безбедноста, борбата против корупцијата и хибридните закани, како и други области што се во интерес на граѓанките и граѓаните.
Пожелно е прилозите да бидат фокусирани на една тема. Учесниците во оваа акција за прибирање мислења, предлози и барања, можат да се потпишат и да испратат фотографија со кратка биографска белешка (максимум 10 реда), можат да се снимаат со видео обраќање, но можат да побараат да останат и анонимни. Исто така, тимот за медиумска продукција стои на располагање и за снимање на заинтересираните. Прилозите треба да се испраќаат на civil@civil.org.mk со назнака: „Граѓански форум за учество во креирање на владините политики“.
Стоп на насилството и говорот на омраза
ЦИВИЛ најостро го осудува секој акт на насилство, а особено актите кои произлегуваат од омраза кон неистомислениците или кон припадниците на различни заедници. Организацијата го осудува насилството врз претседателот на организацијата ЛГБТИ Јунајтед од Тетово, Беким Асани и бара од надлежните институции да ги пронајдат и санкционираат напаѓачите.
Насилството е неприфатливо и недозволено во едно демократско општество. Физичкото, но и вербалното насилство, омразата и клеветењето, оркестрираните хајки кон луѓе, поради тоа што се различни. За жал, во нашето општество, подолго време се негува култура на неказнивост. И покрај напредокот во областа на правата на ЛГБТИ заедниците, сè уште постојат сериозни предизвици.
ЦИВИЛ отсекогаш бил и ќе биде организација што стои во одбрана на правата на ЛГБТИ заедниците и континуирано бара подобрување на нивните права со конкретни политики и практики кои институциите се должни да ги преземат. Не смее да има неказнивост за ништо, а тоа подразбира и укинување на неказнивоста за дела од омраза против ЛГБТИ заедниците. Должност на државата и институциите е да ги применат Законот за заштита од дискриминација и говор на омраза за сите подеднакво.
КРАЈ за привилегиите
ЦИВИЛ ја започна иницијативата за укинување на привилегиите на функционерите во мај 2019 година. Иницијативата ја поддржаа шест илјади граѓанки и граѓани во онлајн петицијата што ја започна организацијата.
Според ЦИВИЛ, бесмислено е да се трошат огромни суми пари за доживотни повластици на поранешните претседатели на државата, без оглед на тоа дали тие биле на висината на својата функција или биле криминалци. Едноставно, нема ниедна логична причина тие доживотно да живеат во раскош на сметка на сиромашните граѓанки и граѓани на Република Северна Македонија.
Со оваа иницијатива, почнувајќи од поранешните претседатели, завршувајќи со раководителите на државните агенции и други институции, сите повластици мора да се укинат, односно да се редуцираат до ниво што е прифатливо за една земја која се декларира како социјална држава, според Уставот.
Иницијативата започна со соопштение на ЦИВИЛ на 14 мај 2019, за потоа, организацијата, во присуство на голем број медиуми, да достави барања до парламентот на 17 мај, во пет минути до 12 часот.
На 5 јуни 2019, ЦИВИЛ ја организираше и трибината „Крај за расипништвото“, каде заинтересираните граѓанки и граѓани имаа можност подетално да се запознаат со барањата на организацијата кои се однесуваат на намалување, односно укинување на привилегиите на јавните функционери.
