Претседателот Стево Пендаровски денеска истакна дека во овој момент нема потреба да прогласи нова вонредна состојба и дека според информациите од Владата, обезбедени се доволно количини на заштита е економски мерки за поддршка за националната економија.
„Споредбите кои се прават меѓу претходните вонредни состојби и бројот на тогаш заразени и починати и актуелните бројки на заразени и починати се без осново, затоа што ниту една вонредна состојба не беше воведена од тие причини, а за полицискиот час, карантин или кризна состојба на целата територија на државата постои законска регулатива и нема потреба да воведува вонредна состојба за да се применуваат истите“, додаде Пендаровски.
Пендаровски додаде дека во јавноста се пласира дека вонредната состојба има врска со датумот на изборите, и тој истакна дека истите можат да се организираат и за време на вонредна состојба, само Владата ако сака може во уредбата каде стои „по завршување на вонредната состојба продолжуваат да течат изборните рокови“ да напише „изборните рокови течат и за време на вонредната состојба“.
„Знам дека најголемиот дел од нашите граѓани не размислуваат за избори во време кога имаме пораст на заболени, меѓутоа избори и во време на корона, која нема да замине наскоро, се неопходни за да добиеме функционален, наместо распуштен Парламент и легална и легитимна наместо техничка влада“, вели Пендаровски.
Пендаровски во изминативе недели имал комуникација со лидерите на политичките партии и со стратешките партнери од меѓународната заедница.
„Власта и опозицијата се согласни дека на зборите мора да има набљудувачка мисија на ОБСЕ/ОДИХР, ДИК во соработка со Комисијата за заразни болести, треба да изготви посебни протоколи за безбедно гласање на граѓаните, и безбеден престој во просториите на гласање на членовите на избирачките одбори и домашните набљудувачи и меѓународни. За жал власта и опозицијата не ги приближија своите ставови за датумот на изборите “, додаде Пендаровски.
Пендаровски предупреди дека доколку не успеат да се договорат за транспарентен и инклузивен изборен, процес тоа ќе значи влез во длабока политичка криза.
„Од тие причини сакам да упатам јавен повик до претседателите на најголемата партија во власта, Зоран Заев и најголемата опозициска партија, Христијан Мицкоски да седнеме уште денеска и да најдеме излез од оваа ситуација, со ставање на државните над личните и партиските интереси. Во спротивно ќе ја отвориме вратата за уште поголема криза и не само што ќе ја доведеме во прашање нашата европска перспектива, туку ќе ги поткопаме нашите напори да излеземе накрај со пандемијата, за што ни е потребен јасен државен консензус и стабилни институции“, истакна Пендаровски.
А. Петровска
