Нема пари за работниците, власта одбива да ја покачи минимална плата – цените растат, граѓаните осиромашуваат

Цените растат, граѓаните осиромашуваат, додека владата предводена од ВМРО-ДПМНЕ и Христијан Мицкоски ја пласира својата „неспособност“ зад празни зборови и оправдувања, велат опозиционите партии.

Од таму додаваат дека додека во секоја нормална држава, одговорната власт би презела мерки за да ги заштити своите граѓани од ударите на инфлацијата која се покачува, оваа власт прави токму спротивното – со својата пасивност, тие стануваат соучесници во секое празнење на паричникот на граѓаните.

– Ова не е само неспособност – ова е предавство на граѓаните. ВМРО-ДПМНЕ ја покажа својата вистинска страна, и таа е – страна на ароганцијата, на незаинтересираноста за секојдневните проблеми на луѓето и на заштитата на нивните лични интереси. Сè се сведува на гола пропаганда и ПР со кој ни ги мачкаат очите. СДСМ неколку пати понуди вистински одговор на овие предизвици. Покачување на минималната плата, покачување на платите на сите работници, реално намалување на цените. СДСМ знае како ова се прави затоа што тоа го правеше седум години наназад. Но арогантното ВМРО-ДПМНЕ не прифати ништо, ниту еден амандман за буџетот, ниту една предлог мерка предложена од пратениците, велат од опозициската СДСМ.

Социјалдемократие веќе поднесеа Закон за зголемување на минималната плата во Собранието. Со оваа мерка се предвидува минималната плата да се зголеми на 27.700 денари, односно 450 евра.

Месечната нето-плата во октомври оваа година изнесува 685 евра, објави Државниот завод за статистика. Споредбено со Србија истиот месец просечната плата била за 157 евра повисока од македонската.

„Македонија заостанува и во однос на соседните земји, каде работниците заработуваат значително повеќе. Во Босна и Херцеговина просечната плата изнесува 720 евра, во Црна Гора 944 евра, во Хрватска 1.340 евра, а во Словенија 1.514 евра“, велат податоците на Државниот завод за статистика на Македонија.

Сепак кај нас има зголемувањето на просечната месечна исплатена нето-плата по вработен, во однос на претходниот месец.

„Тоа е забележано во секторите: Дејности во врска со недвижен имот (7,5%), Образование (5,0%) и Градежништво (3,1%) и се резултат на зголемениот минималец и покачувањата во јавниот сектор, како и одливот на работна сила во странство“, соопштија од Државниот завод за статистика.

Просечната плата во Македонија во последните десет години пораснала за околу 94 отсто. Но, и покрај двојниот раст, Македонија е на дното на Европа според висината на просечните плати.

Податоците на Светската банка покажуваат дека во земјава и натаму има илјадници луѓе кои живеат во сиромаштија.

Во студијата се вели дека 2023 година завршила со 86.405 луѓе кои живеат во екстремна сиромаштија и дека 519.452 се умерено сиромашни. Поповолното сценарио за истата година предвидело да има 70.084 екстремно сиромашни и 439,022 кои живеат во умерена сиромаштија.

Дестан Јонузи / Извор: Фронтлајн