„Фактите се на моја страна. Давам ветување, и ќе инсистирам на побрзо завршување на судската постапка. Последното што ми паѓа на памет е да бегам. Против мене се изнесоа многу невистини и сакам сето тоа да се расчисти. Не сум сторила ниту едно кривично дело, 20 години работам во интерес на Република Македонија, во институции кои се борат против криминалот. Неосновано е за мене да се бара притвор бидејќи ако некој нема интерес од бегство – тоа сум јас“, рече поранешната министерка за внатрешни работи, Гордана Јанкуловска, на денешната јавна седница на Апелацискиот суд во Скопје.
Специјалното јавно обвинителство побара притвор за Јанкуловска поради тоа што е обвинета за три кривични дела и ѝ се закануваат најмалку 5 години затвор. Специјалниот обвинител Гаврил Бубевски на јавнаата седница рече дека за Јанкуловска постои сознание и доказ дека влијаела врз член на партијата од ВМРО-ДПМНЕ, кој е сведок во постапката.
Одбраната на Јанкуловска тврди дека тие имаат сознание дека сведокот, за кој зборува СЈО, претходно била обвинета во постапката, и според нив, ова е доказ што е прибавен на незаконит начин. Адвокатот Боро Тасевски, образложувајќи ја жалбата, наведе дека Јанкуловска е дипломиран правник со висока акдемска титула од областа на правните науки и дека не заслужува ваков третман.
И поранешниот министер за транспорт и врски, Миле Јанакиески рече дека не го сторил кривичното дело и дека чека да почне судската постапка за да докаже дека е невин.
Поранешниот генерален секретар на Владата, Кирил Божиновски побара да му биде вратен пасошот и пред судот рече дека соработувал во истрагата и дека не постојат никакви основи да му биде определен притвор.
Пред судот единствено не се појави поранешниот шеф на кабинет на Груевски, Мартин Протоѓер. Според неговата одбрана, Протогер бил на лекување во Будимпешта кога му биле одредени мерки. Веднаш се вратил во Македонија, го предал пасошот и го продолжил лекувањето во Македонија.
Вчера, судиите од скопска Апелација ја отфрлија и жалбата на обвинетиот од СЈО, актуелен пратник на ВМРО-ДПМНЕ, Илија Димовски – да му биде вратен пасошот, и го потврдија решението на Кривичниот совет на Одделението за организиран криминал и корупција при Основниот суд Скопје 1, од Скопје.
Димовски во жалбата наведува дека не постои опасност од бегство, се јавувал на сите покани од СЈО, и дека доколку имал намера да бега, досега имал доволно време да го стори тоа. На Димовски не му е јасно од кои причини и врз основа на кои конкретни докази, судот го темели заклучокот дека е потребно да бидат определени мерки за претпазливост.
