РИБАРО
Осудениот криминалец Сашо Мијалков, на своите блиски им најави дека после свадбата на синот, сега ќе прават нова гламурозна свадба во Мериот. Овој пат ќе го женат КЗ (Кривичниот законик) со секси кукла на надувување со име Криминална Правда, дознава АХА.
КЗ заедно со влечковците од судството и обвинителството, вчера овозможија да застари делото за прислушувањето каде Началникот беше еден од главните осомничени.
„Видовте ли што се објави драги мои свадбари – Судот донесе решение за запирање на кривичната постапка за случајот за „Таргет-Тврдина” за обвинетите Горан Груевски, Сашо Мијалков, Надица Николиќ, Владимир Варелов, Маријан Шумуликоски и Васил Исаковски за делата злосторничко здружување и злоупотреба на службена положба и овластување поради настапено застарување. Со ова застаруваат кривичните дела за нелегалното прислушување за предметот, а во судница остануваат обвинетите што се опфатени со делот за ништење на опремата. Па ова е повод да продолжиме со веселбата!“, рече Мијалков во кругот на најблиските.
„Враќајте ги сватовите, украсите, лустерите, танчерите. Јавете им на „ѕвездите од „македонскиот џет-сет“ кои нè испоштоваа така благодарно на свадбата од синот. Пратете им покана на пратениците кои го изгласаа Законот, а и на оние моите шампиони и Мицкови вмровци кои као беа против а мудро овозможија да има кворум за да се изгласаат измените на КЗ. Поканете ги и судиите и обвинителите кои исцрпно го влечкаа предметот со години. Кажете им дека сите ги сакам!“, истакнал Мијалков од затворот во Струга, видно радосен и возбуден, дознава АХА.
Свадба ќе е уште поголема!
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK
