Со конституирање на новиот парламентарен состав, време е да се размислува за задолжително разгледување на ревизорските извештаи подготвени од Државниот завод за ревизија – ДЗР, на седницата на Комисијата за финансии и буџет, па и на седница на Собранието.
Ова се дел препораките сместени во вториот квартален извештај од следењето на работата на ДЗР, изработен од Фондацијата за демократија на Вестминстер (ВФД) и Центарот за економски анализи (ЦЕА).
На денешната прес-конференција беше потенцирано дека сите институции кои се финансирани од буџетот на Република Македонија се опфатени со работата на ДЗР. Оттука, како што посочи Дамир Незири од ВФД, ревизорските извештаи содржат многу информации за работата на институциите и нивното задолжително разгледување ќе придонесе за поголема финансиска транспарентност.
„Извршувајќи ја својата работа во текот на 2016 година, ДЗР доставил седум ревизорски извештаи до Јавното обвинителство, од каде сè уште не е добиен повратен одговор. Општина Кочани, Министерството за економија, ЈП ‘Македонија пат’, Министерство за образование и наука…, се дел од институциите каде ДЗР детектирало неправилности во работењето“, вели Габриела Димоска од ЦЕА.
Како што истакнаа претставниците од ДЗР присутни на прес конференцијата, најчесто испратените извештаи се однесуваат на неправилности во делот на трошењето на буџетските средства и на злоупотреба на службената положба на вработените.
„Нашата надлежност завршува со утврдување на неправилностите и испраќање на извештаи до надлежни институции. Ние не сме надлежни да дадеме суд дали треба да се покрене постапка. Нашиот извештај е врховен и не подлежи на понатамошни докажувања пред други инстанци“, одговори Александар Поповски генерален секретар на ДЗР, на прашањето дали се постапува по нивните извештаи.
Од ДЗР истакнаа дека соработуваат и со Специјалното јавно обвинителство и во неколку наврати постапиле по нивни барања. Исто така, нивата работа опфаќа и следење на финансирањето на политичките партии за време на предизборните кампањи, но и во останатиот дел од нивното работење.
Извештајот е дел од проектот „Подобрување на финансиската отчетност и транспарентност во Македонија“, поддржан од Британска амбасада во Скопје.
М. Теговска
