Бројот на загинати во Туркије и Сирија во последните неколку моменти повторно се зголеми. Сега е потврдено дека само во Туркије загинале 20.665 луѓе.
Уште 3.553 лица загинаа во земјотресот во Сирија. Со ова вкупниот број на потврдени смртни случаи во двете земји достигна 24.218.
Во меѓувреме, околу 80.000 луѓе се повредени по потресот што го погоди регионот. Се наведува дека речиси 93.000 лица се евакуирани од областа на земјотресот во јужна Туркије, а над 166.000 луѓе биле вклучени во спасувачките и хуманитарните операции.
Во изминатиот час новинари на Би-Би-Си известија за афтершок што се случи во градот Газиантеп.
Геолошкиот институт на САД посочува дека ударот бил со интензитет од 4,5 степени.
Хуманитарни работници велат дека Сирија се соочува со „кошмарно сценарио“ бидејќи речиси пет и пол милиони луѓе би можеле да останат без покрив над главата по разорниот земјотрес. Со оглед на тоа што земјата веќе се соочува со последиците од над 10-годишниот воен конфликт, хуманитарните работници велат дека операциите за опоравување во Сирија веројатно ќе траат многу подолго отколку во Туркије.
