Претседателот Доналд Трамп не се обидува само да ја запре транзицијата од фосилни горива во САД. Тој врши притисок и врз други земји да се повлечат од своите климатски заложби и да согоруваат повеќе јаглен, гас и нафта, пишува Њујорк Тајмс.
Трамп тоа го прави преку тарифи, давачки и други механизми на најголемата економија во светот. Портпарол на Белата куќа изјави дека администрацијата „нема да ја загрози економската и националната безбедност на САД за да гони нејасни климатски цели“.
Еве некои од начините на кои администрацијата на Трамп се обидува да влијае врз климатските политики на други земји:
- Администрацијата вети дека ќе воведе тарифи, визни ограничувања и пристанишни такси за земјите што ќе гласаат за глобален договор за намалување на стакленичките гасови од поморскиот транспорт.
- Речиси сите трговски договори на администрацијата содржат обврски за трговските партнери да купуваат огромни количини американска нафта и гас.
- Администрацијата им се приклучи на земјите производители на нафта, како Саудиска Арабија, во спротивставувањето на ограничувањата за производството на пластика базирана на нафта.
Енергетските експерти и европските претставници го нарекоа нивото на притисок што Трамп го врши врз другите земји загрижувачко. Научниците широко се согласуваат дека за да се избегнат уште потешки последици од климатските промени, земјите мора брзо да се откажат од фосилните горива и да преминат на чисти извори на енергија како ветер, сонце, геотермална енергија и хидроенергија, пишува Њујорк Тајмс.
