ЏАБИР ДЕРАЛА
На патот „од нива до трпеза“, премиерот Мицкоски нареди бисер по бисер од изјави. Небаре премиер кој се прославил со својот труд да ја направи Нашата земја почитувана, демократска, интегрирана со Европа и светот – тој одговара на прашања за најгорливите светски кризи со крајна леснотија, чиниш зборува за облините на тиквите на пазар.
„Има кризен штаб во МНРиНТ, се следи будно состојбата преку извештаите кои што ги добиваме преку службени канали, така што не би коментирал повеќе од ова што го кажав“, изјави премиерот по отворањето на манифестацијата „Од нива до трпеза“ во Скопје.
А што, веќе кажа нешто? Или тоа беше сè?
Зошто не би коментирал премиерот на Нашата држава за „кризниот штаб“ за Блискиот Исток? Точно така, погодивте – не би коментирал затоа што не знае и не го интересира. Барем јас немам поинакво објаснување.
Па за трагедијата во Кочани не направи ништо повеќе од тоа да отвори телефонска линија! Да, вети дека ќе го „премести“ Кочани во Пониква – како да се работи за гајба домати, не за живи луѓе кои минале низ трагедија и сега се соочуваат со ужасните последици. И, се разбира, испозатвори едно чудо луѓе, а никој не почувствува ни правда, ни помош.
Но затоа ќе го реши судирот меѓу Израел и Иран, откако неговата претседателка ги спаси океаните.
Запрашан за неговиот вицепремиер Стоиљковиќ, кој не е излезен од руската амбасада – и руската цврста прегратка – премиерот вели дека „не треба да има дилеми околу ставот на Владата за руската агресија.“ Поточно, не одговори конкретно на прашањето – во моја верзија – што по ѓаволите бара вицепремиерот на државата (нашата) што е на руската листа непријателски држави на Денот на Русија, туку го премести фокусот онаму каде што ја чувствува вината.
„Ставот на Владата околу руската агресија е многу јасен, непроменет и прецизен. Присуството на вицепремиерот Изет Меџити во Одеса е јасна потврда, така што не треба никој да има апсолутно никаква дилема.“ Аха, Меџити е изговорот. Тенок, многу тенок изговор. Најмалку што може некој да заклучи од овој одговор е дека Мицкоски седи на две столици, од кои едната половина на површината со која седи е Стоиљковиќ, а другата Меџити.
Да не се работеше за ужасни и трагични настани, ќе кажев дека премиеров како да е излезен од македонска варијација од „Житието на Брајан“ на Монти Пајтон. Веројатно еден ден и ќе биде напишана една добра црна комедија – за овие години, кога пародијата и трагедиите станаа наша реалност.
Текстот е личен став на Авторот.
