Повеќето градови од државава веќе испратија помош за Турција и Сирија, а градот Скопје втор ден заглави во административните процедури. Наместо денеска седницата на Советот ќе се одржи дури утре, а градоначалничката Данела Арсовска испрати само пет пожарникари во Турција, кој ја сочинуваат противпожарна бригада на Град Скопје.
Градот на солидарноста како што го нарекуваат Скопје, по два дена кога се случи земјотресот во Турција и Сирија, најави дека денеска ќе се одржи седница на Советот на Град Скопје со дневен ред за одобрување хуманитарна помош од 6 милиони денари (100 илјади евра) за Турција и Сирија.
За разлика од Скопје општина Гостивар на чело со градоначалникот Арбен Таравари јави дека осум пожарникари од Територијалната противпожарна екипа –заминаа за Турција заедно со хуманитарна помош. Тие ќе им помогнат на турските власти во санирање на штетите и ќе пружаат помош на тамошните жители по катастрофалните потреси што го зафатија погодениот регион на Турција.
Исто така пет пожарникари од Територијалната противпожарна единица (ТППЕ) – Штип ќе заминат за Турција. Општината ќе даде финансика поддршка во име на хуманоста и солидарноста на најпогодените подарчја и населени места во Турција, со цел да се помогне на настраданите и при извлекувањето луѓе кои се под урнатините во подрачјата каде што се случи катастрофалниот земјотрес, соопштија од Општина Штип, Иван Јорданов.
Осум специјално обучени и искусни пожарникари од ТППЕ Струмица, припадници на тимот за пребарување и спасување од урнатини со 2 противпожарни возила денеска заминаа во спасувачка мисија во пријателска Турција.
„Советот на општина Тетово на вонредната седница одржана денеска додели средства во вредност од 1 милион денари во овие тешки денови за турскиот и сирискиот народ. Дополнително, беше изгласан предлог за формирање на Комисија за следење на постапката за собирање и доставување помош за земјите погодени од земјотресот. Ќе се формират пунктови каде граѓаните ќе можат да им помагаат на турските и сириските граѓани со облека и различни работи според нивната волја и можности“, напиша градоначалникот на Тетово, Билал Касами.
Од друга страна директорот на Дирекцијата за заштита и спасување Беким Максути истакна дека испратиле тимови во состав од 39 обучени и опремени спасувачи во Турција, каде треба да помагаат во спасување на преживеани од под урнатините по разорните земјотреси што ја погодија земјата.
Н. А.
