По повод јубилејот 20 години Народен правобранител, во Собранието на Република Македонија ќе се одржи панел-дискусија на тема „Институцијата Народен правобранител во Република Македонија: почетоци, развој и предизвици“ со почеток во 11 часот.
Панел-дискусијата ќе ја отворат претседателот на Собранието на Република Македонија Талат Џафери, претседателот на Владата на Република Македонија, Зоран Заев, народниот правобранител Иџет Мемети, претседателот на Асоцијацијата на Омбудсмани на Медитеранот и омбудсман на Република Албанија, Еринда Баланца, а преку видео обраќање честитки за јубилејот ќе испрати Европскиот омбудсман Емили О’ Рајли. Од името на Комесарот за човекови права на Советот на Европа ќе се обрати Бојана Урумова.
Исто така, денес и утре во Хотелот „Холидеј ин“ Скопје во рамките на десеттиот јубилеен состанок на Асоцијацијата на Омбудсманите на Медитеранот (АОМ), ќе се одржи конференција на тема „Народниот правобранител како заштитник на социјалните, културните и еколошките права“, на која ќе учествуваат омбудсманите и претставници на омбудсман институциите од земјите членки на Асоцијацијата.
Првиот ден од конференцијата, ќе почне во 14 часот и ќе биде посветена на темите улогата на народниот правобранител во заштита на социјалните права на ранливите категории на граѓани и на улогата на народниот правобранител во заштита на културните права. На вториот ден од конференцијата ќе се дискутира на темата улогата на народниот правобранител како заштитник на правата од животната средин, а планирано е и усвојување на Декларација на Асоцијацијата.
МЛ