Во организација на Центарот за истражувачко новинарство СКУП – Македонија, а во соработка со Коалицијата за заштита на укажувачите во Југоисточна Европа (SECWP), утре со целодневна програма во МКЦ, ќе се одбележи Меѓународниот ден на укажувачите.
На програмата е предвидена средба со укажувачите, говори на граѓански активисти, прес-конференција и музика со Crossroad Blues Band.
По воведното излагање на Арзу Гејбула, активистка за човекови права и новинарка, свое обраќање за слободата на говор и улогата на укажувачите, ќе имаат Специјалната јавна обвинителка Катица Јанева, укажувачот Симо Груевски, меѓународниот тим-лидер Петрус Тоинес, Џабир Дерала од ЦИВИЛ – Центар за слобода, истражувачкиот новинар Зоран Иванов и Слаѓана Тасева, претседателка на Транспаренси интрнешнл, Македонија.
Одбележување на Меѓународниот ден на укажувачите и Денот на слободен говор во Македонија се израз на потребата за зачувување на слободата на говор и на медиумите, како и за укажување на значајната улога на граѓанките и граѓаните кои решиле храбро да се спротивстават на заканите за јавниот интерес.
Во светски рамки, улогата на укажувачите е сé поголема, а како што велат организаторите, преку своите активности, укажувачите ширум светот спасуваат многу животи, десетици милијарди евра и огромни јавни и природни ресурси.
Како медумски партнери на настанот се јавуваат Канал 77 и Нова ТВ. Настанот ќе биде проследен и со презентација на наградата „Слободен говор 2017“ и промоција на веб-страницата на Денот на укажувачите.